E pazakontë/ Ishulli italian po dhuron dhitë, tejkalojnë numrin e njerëzve

Kur numri i dhive në ishullin italian të Alicudi e tejkaloi popullsinë njerëzore gjashtë herë, autoritetet vendase kuptuan se ishte koha për masa drastike. Është marrë vendimi që dhitë t’u jepen si dhurata të interesuarve.

Kryetari i një ishulli të vogël italian të mbushur me dhi të egra ka ofruar t’ia japë kafshët kujtdo që dëshiron t’i marrë ato.

Riccardo Gullo erdhi me këtë ide pasi një regjistrim i fundit tregoi se numri i dhive në pesë kilometra katrorë të Alicudi, ishullit më të vogël të arkipelagut Eolian, është gjashtë herë më i lartë se numri i njerëzve, që janë 100 gjatë vitit.

Numri i dhive është rritur kaq shpejt vitet e fundit, saqë ato kanë filluar të lëvizin nga vendbanimi i tyre i zakonshëm në majën e ishullit drejt zonës së banuar.

Kafshët gradualisht shkaktuan dëme në bimësinë e gjelbër të harlisur, duke shkaktuar kërdi në kopshte dhe parcela, duke shembur pjesë të mureve prej guri. Ndodhi edhe që ato të futeshin nëpër shtëpitë e njerëzve duke i detyruar banorët të kërkonin zgjidhje nga autoritetet.

Alicudi, e cila është dy deri në tre orë me varkë nga Siçilia, ndodhet nën administrimin e ishullit më të madh të Liparit. Nisma “Adopto një dhi” është paraqitur si mënyra më e mirë për të adresuar këtë çështje, dhe padyshim më e dhembshura.

“Ne absolutisht as që duam të mendojmë për vrasjen e kafshëve, prandaj i japim ato.” Kushdo mund të bëjë kërkesë për një dhi, nuk duhet të jetë fermer dhe nuk ka kufizim në numër”, tha Gulo.

Afati i aplikimit është 10 Prill.

“Tashmë kemi pasur disa telefonata, duke përfshirë një blegtor nga ishulli Vulcano, i cili do të donte të merrte disa dhi sepse, ndër të tjera, prodhon rikota, një djathë që vlerësohet shumë”, tha Gullo, duke shtuar se do të ishte edhe më e këndshme dhe më njerëzore nëse në mesin e atyre që marrin dhi do të kishte nga ata që dinë t’i zbusin.