Zgjedhjet e 4 Korrikut dominojnë titujt e gazetave britanike
Rishi Sunak mbajti tubimin e parë dhe u shpreh se Partia Laburiste mund të kërcënojë stabilitetin nëse vjen në pushtet.
Gazetat britanike u hapën me thirrjen e kryeministrit Rishi Sunak për mbajtjen e zgjedhjeve në 4 Korrik. Daily Mail pro-konservatore në faqen e parë mbante titullin, “Tani është momenti që Britania të zgjedhë të ardhmen e saj”.
Ndërkohë, tabloidi “The Sun” mban një titull ironizues, “Oh fletëvotimet”. Menjëherë pasi shpalli datën e zgjedhjeve Rishi Sunak mbajti tubimin e tij të parë zgjedhor të përgjithshëm. Sunak u shfaq në Qendrën ExCel të Londrës lindore, i shoqëruar nga gruaja e tij Akshata Murty, disa ministra të kabinetit të tij dhe rreth 100 anëtarë të partisë.
“Laburistët duan që ju të mendoni se këto zgjedhje kanë përfunduar para se të fillojnë. Por ne do të luftojmë. Ne do të luftojmë çdo ditë për vlerat dhe vizionin tonë,“ tha Sunak.
Duke treguar shenjat e një rimëkëmbjeje ekonomike në Mbretërinë e Bashkuar, Sunak përshëndeti rënien e inflacionit dhe rritjen e ekonomisë me ritmin e saj më të shpejtë në pothuajse tre vjet. Ai tha se Partia Laburiste e opozitës do të kërcënonte stabilitetin duke rritur taksat si dhe do të ndryshonte politikën e tij të diskutueshme për të dërguar azilkërkues të paligjshëm në Ruandë.
Sipas sondazheve Partia Laburiste ka mbajtur një epërsi prej rreth 20 pikësh në sondazhet e opinionit që nga fundi i vitit 2021, përpara se Sunak të merrte detyrën në tetor 2022 dhe pas skandalit të kryeministrit të Boris Johnson dhe trazirave të mandatit 49-ditor të Liz Truss. Britanikët gjithashtu u shprehën se këto zgjedhje të reja do të vulosin të ardhmen e vendit, mes pakënaqësive në rritje.
“Po, ndihem mirë për këtë. Por unë mendoj se do të ishte mirë nëse do të kishte disa kandidatë të ndryshëm që ne mund të zgjidhnim, të cilët mund të jenë më të mirë se këta që janë të regjimit aktual.”
Javën e ardhshme, Mbreti ka rënë dakord të shpërndajë Parlamentin. Afati i fundit i partive për t’u regjistruar është e marta 18 Qershorit. Fushata me të vërtetë rritet me shpejtësi gjatë gjithë qershorit deri të enjten më 4 korrik, kur votuesit shkojnë në kutitë e votimit në ditën e votimit. Më pas, disa ditë më vonë, më 9 Korrik, deputetët e sapozgjedhur do të takohen për herë të parë për të bërë betimin zyrtar dhe për të zgjedhur një kryeparlamentar.
