Një grua transgjinore fitoi konkursin e Miss Portugalisë

Marina Machete fitoi titullin Miss Portugalia dhe u bë gruaja e parë transgjinore që e bën këtë në këtë vend.

Machete është një stjuardesë 28-vjeçare dhe gruaja e parë transgjinore që fiton konkursin Miss Portugalia dhe do të konkurrojë me një grua tjetër transgjinore për titullin Miss Universe në El Salvador.

Në këtë mënyrë, konkursi Miss Universe 2023, i cili do të mbahet më 18 nëntor në San Salvador, do të mbetet në histori si konkursi i parë i këtij lloji me të paktën dy pjesëmarrës transgjinorë.

“Krenare që jam gruaja e parë transgjinore që konkurron për titullin Miss Universe Portugal. Prej vitesh nuk kam mundur të marr pjesë dhe sot jam krenare që jam pjesë e këtij grupi të jashtëzakonshëm finalistësh”, ka shkruar Machete në rrjetet sociale disa ditë para se të fitonte.

Machete ishte përfaqësuesja e qytetit të Palmela, në Setúbal, prej nga është ajo. Miss-ja aktuale u dallua për angazhimin e saj në mbrojtjen e të drejtave të kafshëve dhe siç raporton gazeta portugeze Público, ajo përveç fitimit të kurorës fitoi edhe në kategorinë që veçon kandidatin më të besueshëm.

Për Machete, pjesëmarrja e saj në konkurs dëshmon se “për fat të mirë, veçanërisht në rastin e familjes së saj, dashuria është më e fortë se injoranca”.

Gjatë verës, Riki Kole bëri historinë e Holandës duke u bërë gruaja e parë trans që fitoi titullin Miss Country. Në shpalljen e saj fituese, juria tha se 22-vjeçarja “ka një histori të fuqishme me një mision të qartë”.