Rritet mbështetja publike për legalizimin e kanabisit në Gjermani

Mbështetja publike për planet për legalizimin e kanabisit rekreativ në Gjermani është rritur sipas një sondazhi të ri.

Në një sondazh të fundit të “YouGov”, çdo votues i dytë me të drejtë vote në Gjermani e vlerësoi legalizimin e kanabisit në mënyrë të favorshme, 50% e të anketuarve deklaruan se ishin plotësisht në favor të legalizimit, në parim.

Krahasuar me sondazhin e fundit në maj, ku vetëm 47% e të anketuarve ishin në favor të vënies në dispozicion të kanabisit ligjërisht, shkalla e miratimit është rritur.

Në sondazhin e kryer nga 11 gushti deri më 15 gusht, 2 387 votues gjermanë u pyetën “A do ta mbështesnit apo kundërshtonit në përgjithësi legalizimin e kanabisit në Gjermani?”

Rreth 40% e të anketuarve thanë se ishin “plotësisht” ose “disi” kundër projektit, ndërsa 10% u përgjigjën “nuk e di” ose nuk bënë asnjë deklaratë.

Megjithatë, 75% e të anketuarve thanë se ishte e rëndësishme që legalizimi i kanabisit të shoqërohej me fushata edukimi për rreziqet e përdorimit për personat nën 18 vjeç.

Sondazhi zbuloi se 68% mendonin se fushata të tilla duhet të ishin një parakusht për legalizim.

Sipas projektligjit, i cili mori dritën jeshile dje nga kabineti i kancelarit gjerman, Olaf Scholz, posedimi i deri në 25 gramë kanabis për personat mbi 18 vjeç dhe kultivimi i maksimumit të tre bimëve për përdorim personal do të jetë i ligjshëm.

Kanabisi do të vihet në dispozicion përmes shoqatave të veçanta, të ashtuquajturat klube të kanabisit.

Megjithatë, sipas projektligjit, kanabisI nuk mund të konsumohet në klube ose në një rreze prej 250 metrash nga ambientet.

Projektligji, i cili duhet të miratohet nga parlamenti, ka të ngjarë të ndryshojë ndërsa Bundestagu pritet ta shqyrtojë atë pas pushimeve verore.

Dhoma e Lartë e parlamentit gjerman, Bundesrat, do të diskutojë gjithashtu projektligjin.