Kosovë-Shqipëri Kurti: Masat e BE-së po e dëmtojnë Kosovën në aspektin financiar

Kryeministri i Kosovës, Albin Kurti, në një intervistë për “Bloomberg” të dhënë të hënën në Slloveni, përveç normalizimit të raporteve me Serbinë dhe përmbylljes së këtij procesi deri në pranverën 2024, ka folur edhe për masat e Bashkimit Evropian që janë vendosur ndaj Kosovës si rezultat i veprimeve të Qeverisë Kurti në veri të vendit.

Kurti ka thënë se masat e BE-së po e dëmtojnë Kosovën në aspektin e përkrahjes financiare e materiale, duke përmendur grantet dhe kreditë që Kosova merr nga BE-ja.

Ai ka thënë se po dëmtohen edhe agjencitë shtetërore dhe komuniteti i biznesit.

“Masat po na dëmtojnë në aspektin e mbështetjes financiare dhe materiale të fondeve dhe granteve dhe kredive që marrim nga BE-ja. Po dëmtojnë agjencitë tona shtetërore dhe komunitetin tonë të biznesit”, ka thënë Kurti në “Bloomberg”.