Spanjë, raportohet për 300 emigrantë të zhdukur pranë ishujve Kanarie

Të paktën 300 persona që po udhëtonin me tre varka emigrantësh nga Senegali në Ishujt Kanarie të Spanjës janë zhdukur, tha të dielën grupi i ndihmës për migrantët Walking Borders.

Dy varka, njëra me rreth 65 persona dhe tjetra me nga 50 deri në 60 në bord, janë zhdukur para 15 ditësh që kur u larguan nga Senegali në përpjekje për të arritur në Spanjë, tha Helena Maleno nga Walking Borders për Reuters.

Një varkë e tretë u nis nga Senegali më 27 qershor me rreth 200 njerëz në bord.
Familjet e atyre në bord nuk kanë dëgjuar prej tyre që kur janë larguar, thaMaleno.

Të tre varkat u nisën nga Kafountine në jug të Senegalit, i cili është rreth 1,700 kilometra nga Tenerife, një nga Ishujt Kanarie.

“Familjet janë shumë të shqetësuara. Ka rreth 300 njerëz nga e njëjta zonë e Senegalit. Ata janë larguar për shkak të paqëndrueshmërisë në Senegal,” tha Maleno.

Ishujt Kanarie në brigjet e Afrikës Perëndimore janë bërë destinacioni kryesor për emigrantët që përpiqen të arrijnë në Spanjë. Vera është periudha më e ngarkuar për të gjitha përpjekjet për kalime.