Tragjedia në Greqi, BBC ka prova që vënë në dyshim rrëfimin e rojës bregdetare greke

Televizioni shtetëror britanik ka marrë prova që vënë në dyshim rrëfimin e rojës bregdetare greke për mbytjen tragjike të anijes.

Për mbytjen e anijes së emigrantëve në Greqi, të mërkurën e kaluar, BBC ka marrë prova që hedhin dyshime në rojën bregdetare greke. Analiza e lëvizjes së anijeve të tjera në zonë, sugjeron se anija e mbipopulluar e peshkimit nuk lëvizi për të paktën shtatë orë përpara se të përmbysej. Roja bregdetare thotë se anija ishte rrugës për në Itali dhe nuk kishte nevojë për shpëtim.

Të paktën 79 persona janë raportuar për momentin të vdekur, por Kombet e Bashkuara thonë se të paktën 500 janë të zhdukur.
OKB-ja ka bërë thirrje për një hetim mbi trajtimin e katastrofës nga ana e Greqisë. Zyrtarët grekë kanë deklaruar se ata që ishin në bord nuk donin ndihmë dhe nuk ishin në rrezik deri pak para se anija e tyre të fundosej.

Kryeministri pakistanez Shehbaz Sharif shpalli të hënën ditë zie për tragjedinë e varkës së peshkimit të fundosur. Shumë pakistanezë dyshohet se kanë vdekur në fundosje, megjithëse numri i saktë ende nuk është konfirmuar zyrtarisht.

Sharif formoi gjithashtu një komision për të hetuar incidentin dhe urdhëroi policinë të gjurmonte personat e përfshirë në trafikimin e qenieve njerëzore. Shumica e emigrantëve të zhdukur ishin nga shteti Azad Kashmir dhe ai i Gujarat, sipas anëtarëve të familjes së tyre pakistaneze.