Taravari në takim me të dërguarin special Saracin dhe ambasadoren Hollshtajn

Kryetari i ASH-së, Arben Taravari sot ka realizuar takim me Manuel Saracin, i dërguar special i qeverisë gjermane për vendet e Ballkanit Perëndimor dhe me ambasadoren gjermane në vend, Anke Hollshtajn.

Në takimin, është diskutur për gjendjen aktuale politike, atë ekonomike dhe energjetike si dhe për procesin e integrimeve evropiane të vendit në Bashkimin Evropian.

“Takova sot përfaqësuesin special të Gjermanisë për Ballkanin Perëndimor, Manuel Saracin dhe Ambasadoren e Gjermanisë në vend, Anke Hollshtajn, ku diskutuan për proceset nëpër të cilat kalon vendi dhe sfidat që na presin periudhën në vijim. Duke falemenderuar për mbështetjen e parezervë që Gjermania i jep vendit dhe qytetarëve tanë, shpalosëm edhe përkushtimin e Aleancës për Shqiptarët për të shtyrë rrugën e filluar bashkë me miqtë ndërkombëtarë drejt BE-së dhe vlerave perëndimore. Ashtu siç e kemi dëshmuar në rastet e fundit kyçe, diplomatët gjerman i njoftuam se mbetemi seriozisht të angazhuar në procesin integrues si dhe atë reformues, për të cilin mbi të gjitha kanë nevojë vetë qytetarët e vendit tonë”, shkruan Taravari në rrjetet sociale.

Bashkëbiseduesit kanë rënë dakord për avancimin dhe intensifikimin e bashkëpunimit, ndërsa Taravari falënderoi për mbështetjen nga ana e Republikës Federale të Gjermanisë./TS/