Alex Jones do të paguajë 965 milionë dollarë dëm për familjet e viktimave të Sandy Hook

Teoricieni i konspiracionit, Alex Jones, është urdhëruar të paguajë 965 milionë dollarë si dëmshpërblim pasi pretendoi në mënyrë të rreme se sulmi në shkollën Sandy Hook në vitin 2012 ishte një mashtrim.

Familjet e tetë viktimave dhe një agjent i FBI-së që iu përgjigj sulmit, kishin kërkuar të paktën 550 milionë dollarë në gjyqin për shpifje në Connecticut.

Ata pretenduan se keqinformimi i drejtuesit të radios çoi në një dekadë ngacmimesh dhe kërcënimesh me vdekje.

Njëzetë fëmijë dhe gjashtë të rritur u vranë në shkollën fillore Sandy Hook.

Jones, i cili themeloi faqen e internetit të ngarkuar me konspiracion dhe talk show Infowars, argumentoi për vite se masakra ishte një komplot i “inskenuar” i qeverisë për t’ua marrë armët amerikanëve dhe se “askush nuk vdiq”.

Ai i quajti prindërit e viktimave “aktorë të krizës” dhe argumentoi se disa prej tyre nuk kanë ekzistuar kurrë.

Jones tani pranon se sulmi ishte “100% i vërtetë”, në një deklaratë që e bëri në gusht në një gjyq të veçantë për shpifje në Teksas.