Zyrtari ukrainas: Bisedimet me Rusinë po vazhdojnë pandërprerë, nesër rezultatet e para

Këshilltari i Presidencës ukrainase, Mykhailo Podolyak, tha se të hënën, më 14 mars, do të paraqesin rezultatet e para të bisedimeve me delegacionin rus.

Podolyak, që është pjesë e delegacionit ukrainas në bisedimet me Rusinë, tha se bisedimet me Moskën po vazhdojnë pandërprerë.

“Sërish. Negociatat po vazhdojnë pandërprerë përmes video-konferencave. Grupet punuese po punojnë vazhdimisht. Një numër i madh i çështjeve kërkojnë vëmendje të vazhdueshme. Të hënën, më 14 mars, një sesion negociues do të mbahet për të përmbledhur rezultatet paraprake”, shkroi ai në Twitter.

Më herët gjatë të dielës, Podolyak tha se beson që brenda ditësh do të arrihen rezultatet e para nga negociatat me Rusinë. Ai përsëriti që kërkesat e Kievit janë që të arrihet armëpushim dhe të tërhiqen trupat ruse.

Edhe nga delegacioni rus kanë shprehur optimizëm se do të nënshkruhet një marrëveshje në ditët në vijim, por nuk janë dhënë detaje se për çfarë bëhet fjalë.

Again. Negotiations go non-stop in the format of video conferences. Working groups are constantly functioning. A large number of issues require constant attention. On Monday, March 14, a negotiating session will be held to sum up the preliminary results…

— Михайло Подоляк (@Podolyak_M) March 13, 2022
Podolyak ka thënë se Rusia po dëgjon me kujdes propozimet e Ukrainës.

Përveç bisedimeve në formatin online, Ukraina dhe Rusia kanë zhvilluar tri runde bisedimesh në Bjellorusi. Kryediplomatët e të dy shteteve janë takuar po ashtu në Antali të Turqisë.

Rusia nisi sulmin e paprovokuar kundër Ukrainës më 24 shkurt. Për shkak të agresionit rus ndaj Kievit, shtetet perëndimore kanë vendosur sanksione të ashpra ndaj Moskës.