Putin nënshkruan dekretin: Nga nesër për gazin rus paguhet me rubla

Mediumi britanik The Guardian, raporton se presidenti Vladimir Putin ka nënshkruar një dekret ku thuhet se nga nesër për gazin rus do të paguhet me monedhën kombëtare ruse Rubla.

“Ai[Putin] ka nënshkruar një dekret që thotë se blerësit e huaj duhet të paguajnë në rubla për gazin rus nga 1 prilli dhe kontratat do të ndërpriteshin nëse këto pagesa nuk do të kryheshin. Ai tha se sanksionet perëndimore ishin përgatitur më parë dhe lufta ekonomike kundër Rusisë filloi vite më parë. Ai shtoi se Perëndimi do të përpiqet shumë të gjejë arsye për sanksione të reja”, raporton The Guardian.

Putin thotë se qëllimi ka qenë minimi i zhvillimit të Rusisë.

Vladimir Putin, javën e kaluar urdhëroi Bankën Qendrore ruse, Qeverinë dhe gjigantin e energjisë, Gazprom – që kontrollohet nga shteti – që të prezantojnë propozime deri më 31 mars lidhur me pagesat e gazit për “shtetet jomiqësore”, përfshirë të gjitha shtetet e Bashkimit Evropian.

Rusia ka thënë më parë se shtetet “jomiqësore” do të duhet të paguajnë gazin rus në rubla nga 31 marsi.