Nuk janë kontrolluar të gjithë shoferët që kanë ngasur autobus në relacionin Shkup – Stamboll dhe anasjelltas, ka bërë të ditur ministri i Transportit dhe Lidhjeve, Bllagoj Boçvarski teksa është përgjigjur në pyetjen e gazetarëve se nëse është konstatuar se ka shoferë që kanë qarkulluar në kufij pa licencë.

Konkretisht, për pronarin e “Besa trans”, për të cilin gjithashtu u tha se ka qenë në njërin e autobusëve të rutës ku ishte autobusi që u përflak në Bullgari, Boçvarski tha se kjo gjë nuk është kërkuar nga Prokuroria për ndjekjen e krimit të organizuar dhe korrupsionit.

“Ne kemi kontrolluar dy shoferët që i kanë ngasur këtë autobus (autobusin e përflakur më 23 nëntor në Bullgari). Kur do të marrim informacione të tjera nga Prokuroria apo institucione tjera, ne do t’i kontrollojmë të gjithë shoferët që kanë qarkulluar në atë relacion (Shkup-Turqi)”, tha Boçvarski, transmeton TV21.

E rëndësishme është që hetimi të jetë i pavarur dhe ne të jemi këtu që të ndihmojmë me informacione, tha më tej ai.

I pyetur edhe për përgjegjësinë e dikasterit që e udhëheq Boçvarski, ai tha se kjo do të përcaktohet nga hetimi në rrjedhë, duke mos precizuar se nëse e ndjen veten përgjegjës që 45 persona humbën jetën më 23 nëntor në Bullgari, pasi autobusi që u përflak u konstatua se nuk kishte pasur licencë për qarkullim ndërkombëtar.