Gjermani, kandidatët për kancelar flasin për koalicionet e mundshme

Kandidatët për kancelarin e ardhshëm të Gjermanisë që do të konkurrojnë në zgjedhjet e përgjithshme më 26 shtator u përballën të dielën në një debat të drejtpërdrejtë televiziv.

Debati u zhvillua midis Armin Laschet, kreut të Unionit Demokratik Kristian konservator (CDU); Olaf Scholz, kandidati i partisë Socialdemokrate (SPD) dhe ministër i financave të vendit; dhe Annalena Baerbock, kandidate e Partisë së Gjelbër dhe bashkëkryetare e partisë.

Kandidatët iu përgjigjën pyetjeve mbi zhvillimet aktuale dhe synimet e ardhshme nga moderatorët Maybrit Illner dhe Oliver Kohr.

I pyetur për koalicionet e mundshme, Laschet tha se ai përfundimisht nuk do të zhvillonte bisedime koalicioni me Partinë e Majtë dhe Partinë Alternativa për Gjermaninë (AfD).

“Partitë demokratike duhet të flasin mes tyre. Ne po luftojmë për t’u bërë partia e parë”, tha ai.

Baerbock theksoi se ata kanë shumë të përbashkëta me SPD-në, veçanërisht në fushën sociale. Ajo tha se ata do të zhvillojnë bisedime koalicioni me të gjitha partitë demokratike dhe se kanë konflikte me Partinë e Majtë për çështje të tilla si politika e jashtme dhe siguria e brendshme.

Scholz tha se populli do të vendosë se si do të dalin zgjedhjet dhe se ai po punon për t’i siguruar SPD-së një mandat të fortë.

“Kushdo që dëshiron të drejtojë Gjermaninë duhet të ketë qëndrime të qarta. Ata duhet të jenë në favor të bashkëpunimit transatlantik. Ata duhet të thonë se NATO është e domosdoshme për sigurinë tonë dhe ata duhet të jenë në favor të një Bashkimi të fortë Evropian”, tha ai.

Laschet tha se kërcënimi më i madh për demokracinë vjen nga e djathta ekstreme. Duke nënvizuar se ai po lufton me krahun e djathtë ekstrem dhe racistët, ai tha se ka vendosur kufij kundër ekstremit të djathtë.

Baerbock gjithashtu theksoi se prioriteti i saj do të jetë lufta kundër racizmit.

Të tre kandidatët ranë dakord se digjitalizimi është një çështje urgjente që qeveria e re duhet ta trajtojë.

Pas 16 vitesh në pushtet, kancelarja Angela Merkel është tërhequr nga politika aktive këtë vit, kurse blloku i saj konservator CDU/CSU zgjodhi Laschet, një politikan pragmatik i moderuar, për t’i udhëhequr ata në zgjedhje.