QAYS EBU SEMRA

Aktivistja palestineze Ahed al-Tamimi, e cila u lirua nga burgu izraelit në kuadër të marrëveshjes për shkëmbimin e të burgosurve ndërmjet Hamasit dhe Izraelit, tha se autoritetet izraelite i lënë të burgosurat palestineze pa ujë dhe pa rroba.

E njohur si “vajza e guximshme palestineze”, Tamimi në prononcimin për Anadolu pas lirimit, tha se lirimi i të burgosurve palestinezë për shkak të masakrave të Izraelit u mirëprit me gëzim të hidhur.

Ajo theksoi se Izraeli ka arrestuar rreth 30 të burgosura palestineze, 10 prej të cilave ishin nga Rripi i Gazës, pas sulmeve tokësore që filluan më 27 tetor dhe se gjendja e tyre ishte shumë e keqe.

23-vjeçarja Tamimi, e cila u arrestua nga Izraeli dhe u dërgua në burg më 6 nëntor, tha: “Situata në burg është shumë e vështirë, çdo ditë ka ngacmime ndaj të burgosurave femra. Femrat e burgosura lihen pa ujë dhe pa rroba, flenë në dysheme dhe rrihen”.

Tamimi deklaroi se zyrtarët izraelitë e kërcënuan se do ta sulmojnë babain e saj nëse tregonte se çfarë ndodhi në burg dhe tha: “Pavarësisht gjithçkaje, ne jemi më të fortë se pushtimi. Ne do të vazhdojmë (rezistencën) derisa të marrim lirinë”.

Forcat izraelite arrestuan babanë e Tamimit në Ramallah, në Bregun Perëndimor të pushtuar, në tetor. Babai i Tamimit ende është në burgun izraelit.

Ahed al-Tamimi, e njohur si “vajza e guximshme palestineze”, u vlerësua e denjë për “Çmimin e guximit Hanzala” në Istanbul për qëndrimin e saj ndaj ushtarëve izraelitë kur vëllai i saj u arrestua në vitin 2012.

Tamimi u takua edhe me presidentin Recep Tayyip Erdoğan.

Ajo u arrestua nga forcat izraelite në vitin 2017 dhe qëndroi në burg për 8 muaj.

– Situata e fundit në pushtimin e Gazës nga Izraeli

Ndërsa krahu i armatosur i Hamasit, Brigadat Izzeddin Kassam, nisi sulm gjithëpërfshirës mëngjesin e 7 tetorit, me arsyetimin e “përgjigjes ndaj shkeljeve të vazhdueshme të Izraelit kundër palestinezëve dhe vlerave të shenjta, veçanërisht Mesxhid al-Aksa”, ushtria izraelite nisi bombardimet intensive ajrore në Rripin e Gazës.

Njoftohet se 1.200 izraelitë, përfshirë më shumë se 310 ushtarë humbën jetën ndërsa 5.132 të tjerë u plagosën në sulmet e 7 tetorit në Izrael. Sipas ushtrisë izraelite, 70 ushtarë izraelitë janë vrarë në përleshjet në Gaza dhe 6 në kufirin libanez që nga 7 tetori.

Sipas qeverisë në Gaza, numri i palestinezëve të vrarë në sulmet izraelite në Rripin e Gazës që nga 7 tetori ka kaluar 15 mijë, përfshirë më shumë se 6.150 fëmijë dhe më shumë se 4.000 gra. Që nga 7 tetori, 246 palestinezë janë vrarë në sulmet e forcave izraelite dhe kolonëve hebrenj në Bregun Perëndimor të pushtuar dhe Kuds.

Ushtria izraelite goditi kampuset dhe ndërtesat kryesore të dhjetëra spitaleve në Gaza, ku u strehuan dhjetëra mijëra të plagosur dhe civilë, për të detyruar evakuimin e tyre. Ata bastisën disa spitale gjatë pushtimit. Qindra njerëz u vranë dhe u plagosën nga sulmet.

Që nga 8 tetori 85 anëtarë të Hezbollahut janë vrarë në përleshjet midis ushtrisë izraelite dhe Hezbollahut në kufi.

– Marrëveshja e shkëmbimit të të burgosurve ndërmjet Hamasit dhe Izraelit

Marrëveshja në lidhje me një “pauzë humanitare” 4-ditore në përleshjet midis Izraelit dhe Hamasit hyri në fuqi të premten, më 24 nëntor, në orën 07:00 sipas orës lokale.

Në kuadër të marrëveshjes së shkëmbimit të të burgosurve në kuadër të marrëveshjes së “ndërmjetësimit humanitar” ndërmjet Izraelit dhe Hamasit, 73 të burgosur izraelitë, njëri prej të cilëve burrë dhe të tjerët gra dhe fëmijë janë liruar nga Rripi i Gazës ndërsa janë liruar 210 gra dhe fëmijë palestinezë nga burgjet izraelite.

Katari njoftoi se “pauza humanitare” u zgjat për 2 ditë të tjera si rezultat i përpjekjeve ndërmjetësuese mes Hamasit dhe Izraelit më 27 nëntor.

Ndërsa ushtria izraelite njoftoi se “pauza humanitare” ishte zgjatur më 30 nëntor pa specifikuar një datë, Hamasi njoftoi se pushimi në fjalë ishte zgjatur me një ditë.