Osmani së bashku me kolegët nga Ballkani Perëndimor në takim me Komisionerin Evropian, Oliver Varhelyi në kuadër të procesit të Berlinit në Tiranë

Përfitime konkrete për qytetarët edhe gjatë negociatave me BE-në përmes konceptit “Më shumë integrim para anëtarësimit”

Në kuadër të pjesëmarrjes në takimin ministror të Procesit të Berlinit, i cili po mbahet sot në Tiranë, Ministri i Punëve të Jashtme, Bujar Osmani mori pjesë në takimin e përbashkët me kolegët nga shtetet e Ballkanit Perëndimor dhe Komisionerin Evropian për Zgjerim dhe Fqinjësi, Oliver Varhelyi.

Ministri Osmani rikujtoi se Maqedonia e Veriut këtë vit e ka iniciuar konceptin “Më shumë integrim para anëtarësimit”, me të cilin koncept propozohet përfshirje më e madhe politike dhe institucionale në proceset dhe politikat e Bashkimit Evropian, si dhe rritje të financimit për vendet kandidate, e me këtë edhe më shumë përfitime konkrete për qytetarët edhe gjatë procesit të negociatave me BE-në.

Osmani edhe një herë përshëndeti sinjalet pozitive nga BE-ja, duke cituar fjalët e Kryetarit të Këshillit Evropian, Charles Michel nga Bled, ku viti 2030 u caktua si kornizë kohore për hyrjen e vendeve të reja anëtare.

“Kjo jep një shpresë të re. Koha është që BE-ja të veprojë tani dhe ta bëjë këtë pa hezitim. Në ndërkohë, vendet kandidate duhet të integrohen sa më shumë në proceset dhe politikat e BE-së që të jenë sa më të gatshme për anëtarësim deri në vitin 2030. Për shembull, ministrat e punëve të jashtme nga vendet e rajonit, të cilat kanë 100% harmonizim me Politikën e Përbashkët të Jashtme dhe të Sigurisë të BE-së, duhet të ftohen të marrin pjesë në mbledhjet e Këshillit të Punëve të Jashtme së bashku me ministrat nga vendet anëtare të BE-së”, theksoi Osmani.

Osmani përshëndeti publikimin e Planit të ri për zhvillimin e Ballkanit Perëndimor nga Komisioni Evropian, duke thënë se përdorimi i më shumë fondeve të BE-së, i kushtëzuar nga performanca e reformave të vendeve, do të shërbejë si motivues për reforma dhe do të ndihmojë në mbylljen e hendekut në afrimin me BE-në, si dhe që të përgatitemi më mirë për anëtarësim. “Por, parimi i meritës duhet të mbetet një imperativ absolut – kur vendet tona të realizojnë, BE-ja duhet të japë. Ky është motivuesi i fundit dhe shpresojmë se BE-ja do të mund të marrë vendime të rëndësishme për rajonin këtë dhjetor”, tha Osmani.

Osmani theksoi se një Evropë e bashkuar dhe prosperuese në paqe mund të arrihet vetëm me Ballkan Perëndimor të bashkuar dhe të prosperuar në paqe.