Sulm nga grupi xhihadist në Idlib, vriten tetë ushtarë sirianë

Tetë ushtarë sirianë u vranë sot në një sulm nga grupi xhihadist Hayat Tahrir al-Sham (HTS), një ish-degë e al-Kaedës në veriperëndim të Sirisë, sipas Observatorit Sirian për të Drejtat e Njeriut.

“HTS hodhi predha dhe raketa në një post ushtarak sirian duke vrarë tetë ushtarë pranë Kafr Rumah, provincën Idlib,” tha Observatori Sirian.

Mediat shtetërore siriane deri më tani nuk kanë raportuar për sulmin.

Që nga fundi i vitit 2022, HTS ka “intensifikuar granatimet” kundër pozicioneve të regjimit të Bashar al-Asad në Idlib, pas afrimit midis Ankarasë dhe Damaskut, sipas drejtorit të Observatorit, Rami Abdel Rahman.

Siria dhe Turqia, e cila mbështet rebelët sirianë, kanë rifilluar një dialog pas një përçarjeje prej më shumë se një dekade pas shpërthimit të luftës civile siriane në 2011.

Një takim trepalësh u mbajt në Moskë në dhjetor midis ministrave të mbrojtjes të Turqisë , Sirisë dhe Rusisë, i pari që nga viti 2011.

Turqia ka nisur tre sulme në tokën siriane që nga viti 2016 kundër forcave kurde në Sirinë veriore, të cilat kanë lejuar të vënë nën kontroll një brez kufitar në anën siriane, një “pushtim”, siç ankohet Damasku.

Assad vlerësoi në mesin e janarit se takimet siriano-turke duhet të synojnë ” fundin e pushtimit turk” të territoreve siriane.

Pothuajse gjysma e provincës Idlib dhe zonat kufitare në provincat fqinje të Hama, Alepo dhe Latakia dominohen nga xhihadistët e HTS dhe grupet rebele më pak me ndikim.

Megjithë përplasjet sporadike, një armëpushim i negociuar nga Moska, një aleate e Damaskut dhe Ankarasë është respektuar kryesisht që nga marsi 2020 në atë rajon.

Lufta në Siri ka vrarë gati gjysmë milioni njerëz që nga viti 2011.