La Liga e refuzon regjistrimin e Alonsos, i cili ditë më parë e rinovoi kontratën me Barcelonën

Barcelona raportohet se po përballet me një pengesë të madhe në regjistrimin e zgjatjes së kontratës me Marcos Alonson.


Klubi njoftoi javën e kaluar për arritjen e marrëveshjes me spanjollin për zgjatje të kontratës deri në verën e vitit 2024.

Megjithatë, situata është komplikuar në vazhdim, me La Liga që ka vënë në pikëpyetje aftësinë e Barcelonës për të përballuar marrëveshjen në fjalë.

Sipas raportimeve nga “Cadena SER”, regjistrimi i kontratës së re të 32-vjeçarit para fundit të këtij sezoni do të vendosë Barçën mbi kufirin e pagave të ligës.

Mediumi spanjoll, duke u bazuar në burimet e veta, shkroi se klubi i Barcelonës nuk ia ka dalë të regjistrojë kontratën e re të Alonson, ndonëse ende nuk ka ndonjë njoftim zyrtar.

Është i njëjti rast me Gavin, i cili edhe pse rinovoi në shtator duke nënshkruar kontratë të vlefshme deri në vitin 2026 , ende nuk ka mundur të regjistrohet me kartonin e ekipit të parë dhe me kontratën e re.

Kjo ka të ngjarë të shkaktojë një vonesë të paktën deri në qershor, me Ronald Araujo dhe Gavi gjithashtu duke pritur që të nënshkruajnë kontratat e tyre të reja.