Ministrja për Evropën dhe Punët e Jashtme, Olta Xhaçka është shprehur kundër aneksimit të katër rajoneve ukrainase në Rusi.

Nëpërmjet një postimi në Twitter ministrja tha se Shqipëria dënon referendumet e rreme të organizuara nga Rusia në Ukrainë dhe se Tirana zyrtare nuk do të njohë rezultatet e tyre të paracaktuara.

Çdo aneksim i territorit të një shteti nga një shtet tjetër, që vjen si pasojë e kërcënimeve ose nga përdorimi i forcës është shkelje e parimeve të Kartës së OKB-së dhe ligjit ndërkombëtar.

Vladimir Putin shpalli pak me parë zyrtarisht aneksimin e 4 rajoneve të Ukrainës në një ceremoni në Moskë.

Ai kërkoi një minutë heshtje për të kujtuar ushtarët rusë që kanë humbur jetën. Ai tha se ushtarët vdiqën gjatë operacioneve speciale dhe ata janë heronjtë e Rusisë. Ata vdiqën duke luftuar për tokat, tha ai.

Putin vazhdoi të pretendojë se njerëzit e Donbasit kanë qenë “viktima të sulmeve terroriste çnjerëzore të kryera nga regjimi i Kievit”. Udhëheqësi rus ka pohuar prej kohësh se Ukraina po synon rusishtfolësit në Ukrainën lindore dhe vazhdimisht ka bërë akuza të pabaza se Ukraina ka kryer gjenocid në lindje të vendit.

Aneksimi i provincave lindore dhe jugore nga Rusia vjen pas asaj që Ukraina dhe vendet perëndimore thanë se ishin vota të rreme të organizuara me armë në zonat e pushtuara nga Rusia në Donetsk, Luhansk, Kherson dhe Zaporizhzhia.

Territori që kontrollon Rusia arrin në më shumë se 90,000 km katrorë, ose rreth 15% e sipërfaqes totale të Ukrainës – e barabartë me madhësinë e Hungarisë ose Portugalisë.

Në shkurt, Putin njohu pavarësinë e republikave të vetëshpallura të Donetskut dhe Luhanskut.