Kërkohet 3 mijë denarë ndihmë nga shteti për punëtorët me rroga 18 mijë denarë

Konfederata e Sindikatave të Lira në Maqedoni (KSS) sot sërish iu drejtua të gjithë deputetëve në Kuvend me qëllim që, siç thanë, të pranohet amendamenti i paraqitur nga grupi parlamentar i VMRO-DPMNE-së, i cili do t’u ndihmonte punëtorëve më të varfër në sektorin privat.

Konfederata kërkon që të gjithë punëtorëve në sektorin privat me paga nga 18.000 deri në 21.000 t’u paguhet ndihma financiare nga trefishi i 3.000 denarë, ndërsa ata me paga nga 21.000 deri në 24.000, poashtu trefishin e 2.000 denarë.

Siç informojnë nga Konfederata e Sindikatave të Lira, për këtë masë nevojiten një miliard denarë nga buxheti shtesë. Ata apelojnë deri te deputetët të mbledhin forca dhe të tregojnë mirëkuptim për gjendjen në të cilën ndodhet punëtori dhe ky amendament të miratohet në Kuvend.