Ukraina ka urdhëruar t’i jepet fund udhëtimit pa viza për qytetarët rusë, duke përmendur nevojën për të përmirësuar sigurinë kufitare në vazhdën e pushtimit të Moskës.

Më parë, shtetasit rusë lejoheshin të vizitonin Ukrainën fqinje pa viza, shkruan Skynews, transmeton Klankosova.tv.

Në një urdhër të postuar në faqen e internetit presidenciale, presidenti Volodymyr Zelensky tha se ai mbështeti një peticion të paraqitur nga një qytetar që kërkonte që kjo praktikë të përfundojë.

“Në sfondin e agresionit të plotë rus, çështja e ngritur është e rëndësishme dhe jetike. Unë mbështes nevojën për të forcuar kontrollet për hyrjen e qytetarëve rusë,” tha ai.

Zelensky tha se i kishte dërguar një letër kryeministrit Denys Shmyhal duke i kërkuar që të punonte për këtë çështje.

Ai nuk dha detaje të tjera.

Presidenti rus Vladimir Putin në fillim të muajit të kaluar nënshkroi një dekret për vendosjen e kufizimeve të vizave për qytetarët e vendeve që Moska i konsideron “jomiqësore” – përfshirë Ukrainën.