Shtetet e Bashkuara kanë vendosur sanksione të reja lidhur me të drejtat e njeriut ndaj dhjetëra njerëzve dhe subjekteve të lidhura me Kinën, Mianmarin, Korenë e Veriut e Bangladeshin.

Kanadaja dhe Mbretëria e Bashkuar iu bashkuan SHBA-ve në vendosjen e sanksioneve në lidhje me abuzimet e të drejtave të njeriut në Mianmar, ndërsa Uashingtoni vendosi gjithashtu sanksionet e reja ndaj Koresë së Veriut nën administrimin e Presidentit Joe Biden dhe vuri në shënjestër entitete ushtarake të Mianmarit, ndër të tjera, në aksionin që shënon Ditën e të Drejtave të Njeriut.

“Veprimet tona sot, veçanërisht ato në partneritet me Mbretërinë e Bashkuar dhe Kanadanë, dërgojnë një mesazh se demokracitë në mbarë botën do të veprojnë kundër atyre që abuzojnë me pushtetin e shtetit për të shkaktuar vuajtje dhe represion,” tha Zëvendës Sekretari i Thesarit Wally Adeyemo, në një deklaratë.

“Në Ditën Ndërkombëtare të të Drejtave të Njeriut, Thesari po përdor mjetet e tij për të ekspozuar dhe mbajtur përgjegjës autorët e abuzimeve të rënda të të drejtave të njeriut.”

Misioni i Koresë së Veriut në Kombet e Bashkuara dhe ambasadat e Kinës, Mianmarit dhe Bangladeshit në Washington nuk iu përgjigjën menjëherë kërkesave për koment të këtyre vendimeve, shkruan Aljazeera, transmeton Klankosova.

Masat janë më të fundit në një sërë sanksionesh që koincidojnë me Samitin virtual dy-ditor të Biden për Demokraci, ku ai njoftoi iniciativat për të forcuar demokracinë në mbarë botën dhe mbështetjen për legjislacionin pro-demokracisë në Shtetet e Bashkuara.

Departamenti i Thesarit shtoi të premten kompaninë kineze të inteligjencës artificiale SenseTime në listën e “kompanive komplekse ushtarako-industriale kineze”, duke e akuzuar atë se ka zhvilluar programe të njohjes së fytyrës që mund të përcaktojnë përkatësinë etnike, me një fokus të veçantë në identifikimin e ujgurëve etnikë.