Një nga vrasësit më famëkeq të mafias siciliane, Giovanni Brusca, i njohur për vrasjet monstruoze, përfshirë edhe tretjen e trupit të një fëmije me acid, është liruar nga burgu, shkruajnë mediat e huaja.

I njohur si “kasapi”, Brusca ka rrëfyer rolin e tij në mbi 100 vrasje, përfshirë edhe vrasjen e prokurorit të lartë të anti-mafias në Itali, Giovanni Falcone.

I arrestuar që në vitet 1996 dhe më pas bashkëpunëtor i drejtësisë, ai ditën e djeshme la përfundimisht qelinë, duke shkaktuar jo pak reagime në Italinë fqinje.

Lirimi i tij ka ndezur zemërimin e të afërmve të viktimave të Cosa Nostra-s dhe politikanëve që pretendojnë se Bruska nuk ka dhënë asnjëherë prova reale se është penduar për mizoritë e tij.

“Në planin njerëzor, ky është një lajm që më dhemb. Por ligji për reduktimin e dënimeve për bashkëpunimin e mafiozëve është një ligj që vëllai im e donte ndaj duhet respektuar”, tha Maria Falcone, motra e Giovanni Falcones për ANSA-n.

“Unë vetëm shpresoj se gjyqësore dhe policia do të jenë vigjilentë në mënyrë që të evitojnë rrezikun që ai të kryejë krime sërish”.

Dëshmitë e Brusca-s çuan në fakt në arrestimin e vrasësve dhe shumë bosëve të Cosa Nostra-s por publiku, dhe veçanërisht të afërmit e viktimave, thonë se nuk mund ta falin atë. Ai ishte arrestuar në një vilë në Agrixhento në 1996, nga një polic i quajtur Luciano Traina. Ky i fundit ishte vëllai i një tjetër polici që ishte vrarë nga Cosa Nostra.

Brusca, 64 vjeç, ishte një prej figurave kryesore brenda Cosa Nostra, grupi i Mafias Siciliane.

Më 23 maj 1992 ai aktivizoi bombën që vrau më pas gjyqtarin Giovanni Falcone , gruan e tij Francesca Morvillo dhe tre agjentët e shoqërimit Rocco Dicillo, Vito Schifani dhe Antonio Montinaro.

Brusca ka rrëfyer rolin e tij në më shumë se 100 vrasje monstruoze.

Një nga më të tmerrshmet ishte vrasja e Giuseppe Di Matteo, djali 11-vjeçar i një mafiozi tjetër që e kishte tradhtuar. Brusca e rrëmbeu dhe torturoi djalin, trupi i të cilit u shkri në acid.