Kryeministrja e Serbisë, Ana Bërnabiq, ka thënë se viti 2021 do të mund të ishte festë e madhe për bashkëpunimin rajonal në Ballkan. Megjithatë, sipas saj, gjithçka ka ndryshuar me ardhjen e Albin Kurtit në postin e kryeministrit në Kosovë.

Madje, sipas saj, ekziston mundësia që katër marrëveshje me rëndësi të mos nënshkruhen nga Kurti më 5 korrik në kuadër të takimit të Procesit të Berlinit.

“Në vend që të ketë festë për suksesin e bashkëpunimit rajonal në rajon sivjet, fatkeqësisht me ardhjen e institucioneve të reja të përkohshme në Prishtinë dhe Albin Kurtit, bashkëpunimi rajonal ka marrë qasje tjetër”, ka thënë Bërnabiq në Kuvendin e Serbisë duke iu përgjigjur deputetëve.

Bërnabiq ka thënë se në Berlin, më 5 korrik, në kuadër të Procesit të Berlinit, mund të mos nënshkruhen katër marrëveshje “në të cilat po punohet qe një kohë e gjatë”.

“Nuk mendojmë vetëm ne se kjo është keq, por të gjithë në rajon, edhe ata që e kanë njohur si dhe ata që s’e kanë njohur Kosovën. Të gjithë mendojnë se kjo është keq për rajonin dhe bashkëpunimin rajonal”, ka thënë ajo.

Ajo tutje ka fajësuar Kurtin se “që nga ardhja e tij në pushtet s’ka as deklarata e as marrëveshje të reja sepse ai s’pranon asgjë ku nuk shkruhet Republika e Kosovës”.

Bërnabiq ka thënë se qasjen e Kosovës e shohin si të dëmshme edhe Bosnja e Hercegovina por edhe Moldavia në kuadër të Marrëveshjes së CEFTA-s.