Kryeministri dhe kryetari i LSDM-së, Zoran Zaev dje paralajmëroi takim liderësh deri në fund të vitit. Ai tha se pret ta thërrasë kreu i shtetit, Stevo Pendarovski, por nëse kjo nuk do të ndodhë, atëherë ai do të niste këtë iniciativë. Lideri i VMRO-DPMNE-së, Hristijan Mickoski, nga ana tjetër, paralajmëroi se partia e tij nuk do të marrë pjesë nëse takimi i liderëve organizohet nga Pendarovski.

Edhe Zaevi edhe Mickosi u dakorduan se në takim duhet të bëhet fjalë për krizën e koronavirusit, integrimin evropian dhe çështjet e tjera që janë në interes të qytetarëve.

“Kryetari i VMRO-DPMNE Hristijan Mickoski i bëri thirrje Presidentit të thërrasë një takim liderësh, por unë nuk jam në dijeni se çfarë po ndodh. Nëse një mbledhje e tillë e liderëve nuk realizohet, unë do ta kontaktoja Presidentin sot-nesër për një qëllim të tillë, nëse jo, unë ndoshta do të thërras një takim liderësh deri në fund të vitit për integrimin evropian, por edhe për ballafaqimin me krizën e koronavirusit dhe për të gjitha fushat e tjera me interes për qytetarët për të cilat mund të diskutojmë në takim”, tha Zaev, duke iu përgjigjur pyetjeve të gazetarëve pas llogaridhënies për punën e bërë në 100 ditët e para që Qeverisë.

Nga ana tjetër, Mickoski në konferencë për shtyp, e riaktualizoi nevojën për mbajtjen urgjente të takimit të liderëve në të cilin do të bisedohej, siç tha ai, për situatën aktuale politike, shëndetësore, arsimore dhe ekonomike.

“Nuk e shoh rolin e Stevo Pendarovskit në këtë takim të liderëve. Stevo Pendarovski nuk është lider i një partie politike. Nëse nevojitet mbështetja e partive politike, që ne partitë politike të bisedojmë për diçka, atëherë dihet që partitë politike duhet të ulen dhe të flasin. Dihet se kush duhet ta thërrasë atë takim liderësh. Ne e kemi kërkuar atë takim disa herë deri më tani. Nëse vlerëson se duhet të ulen politikanët të bisedojnë në atë takim liderësh, unë jam në dispozicionin tuaj. Por, në një format që do të organizohej nga Stevo Penadrovski, unë nuk do të marr pjesë në takim të tillë sepse nuk e shoh rolin e Stevo Penadrovskit në një takim të tillë liderësh”, tha Mickoski, duke shtuar se ai do të marrë pjesë në takimin e liderëve nëse iniciativa vjen nga Qeveria.

Nga Kabineti i Pendarovski tani për tani nuk ka informacione nëse ai planifikon të thërrasë takim liderësh

“Edhe vetë lideri i VMRO-DPMNE-së Mickoski në deklaratë për mediumet tha se presidenti i shtetit nuk është lider i partisë politike, ai kërkon konvokim të takimit me liderët e partive”, theksuan nga kabineti i Pendarovskit.