Ministri i Punëve të Jashtme Bujar Osmani, sot e filloi vizitën e tij të parë, prej se është në këtë funksion, me takime në Parlamentin Evropian, ndërsa pasdite do të takohet me përfaqësuesin e lartë të BE-së për politikë të jashtme.

Osmani paradite u takua me eurodeputetë me ndikim dhe me përfaqësues të grupeve të ndryshme politike. Gjatë vizitës në Parlament, Osmani u takua me Klara Dobrev, nënkryetare e Parlamentit Evropian nga Partia Social Demokrate, Mihail Galer, eurodeputet gjerman dhe anëtar i Partisë Popullore Evropiane, Ana Fotiga, anëtare e AFET dhe koordinatore e Konservatorëve dhe Reformatorëve Evropian, Rajnhard Butikofer, anëtar i AFET dhe koordinator i Partisë së Gjelbër.

Gjatë takimeve, Osmani riafirmoi angazhimet e Republikës së Maqedonisë së Veriut në procesin euro-integrues, por gjithashtu i prezantoi edhe prioritetet e misionit të tij mandatues si udhëheqës i diplomacisë së Maqedonisë së Veriut.

“Pres miratimin në kohë të Kornizës Negociuese, duke i respektuar parimet e Metodologjisë së re në procesin e negociatave. Na pret një klimë pozitive në të ardhmen, shumë punë, por edhe motiv për të ofruar rezultate nga reformat në vend. Fokusi im është në thellimin e marrëdhënieve të mira fqinjësore, jo vetëm si përfitim i ynë autentik, por edhe si kontribut aktiv në bashkëpunimin rajonal, si politikë kyçe për ruajtjen e idesë evropiane në Ballkan”, tha Osmani.

Nga ana e deputetëve u potencua mbështetja e fuqishme ndaj perspektivës evropiane të Maqedonisë së Veriut, e rrjedhës pa pengesa të agjendës evropiane të vendit, miratimit të kornizës negociuese dhe organizimit të Konferencës së parë ndërqeveritare.

Ata theksuan rëndësinë e vazhdimësisë së reformave për të krijuar një atmosferë pozitive për fillimin e negociatave, si dhe njoftuan vazhdimin e dialogut Jean Monnet, në mënyrë që të intensifikohet bashkëpunimi midis partive politike drejt përfshirjes në procesin e negociatave. U theksua se koncepti i një shteti multietnik dhe paqësor, i përkushtuar për gjetjen e zgjidhjeve përmes kompromisit dhe dialogut, njihet si një sukses i madh dhe paraqet shembull jo vetëm për rajonin, por edhe më gjerë.

Duke theksuar aspektin gjeopolitik për rëndësinë e zgjerimit të BE-së me rajonin, unanimisht u konstatua se Ballkani Perëndimor është i rëndësishëm jo vetëm për sigurinë dhe stabilitetin e BE-së, por edhe për progresin e përgjithshëm ekonomik, politik dhe shoqëror të Kontinentit.

Në takime u bë fjalë edhe për bashkëpunimin parlamentar, përgatitjet për Komitetin e ardhshëm të Përzier Parlamentar mes Maqedonisë së Veriut dhe Parlamentit Evropian, ndërsa u bisedua edhe për planet dhe kornizën kohore për përgatitjen e Rezolutës së ardhshme të Parlamentit Evropian mbi vendin.

Osmani gjatë ditës do të takohet edhe me Përfaqësuesin e Lartë për Politikë të Jashtme dhe Siguri dhe njëherit edhe Nënkryetar i Komisionit Evropian, Josep Borell, ndërsa në agjendë për sot është paraparë edhe takimi me Miroslav Lajçak, Përfaqësues i posaçëm i BE-së për Ballkanin Perëndimor dhe për dialogun Beograd-Prishtinë.