Ministri turk i mbrojtjes, Hulusi Akar, tha se vendi i tij është duke u përgatitur për sanksionet e mundshme të Shteteve të Bashkuara për shkak të blerjes së sistemit mbrojtës raketor “S-400” nga Rusia.

Shtetet e Bashkuara kanë kërkuar nga Ankaraja që ta anulojë marrëveshjen për blerje të sistemit rus dhe aleatët e NATO-s kanë shprehur shqetësime për rrezikun potencial e mundshëm që ky sistem paraqet për aeroplanët luftarakë të tipit “F-35”, të cilët prodhohen nga ShBA-ja.

Uashingtoni e ka paralajmëruar Ankaranë se mund të përjashtohet nga programi për prodhimin e aeroplanëve luftarakë dhe të përballet me ndëshkime financiare, nëse e zbaton marrëveshjen e nënshkruar me Rusinë për blerjen e sistemit “S-400”.

Duke folur para gazetarëve të martën, ministri Akar tha se në bisedimet e fundit me Uashingtonin, Ankaraja ka vërejtur zbutje të qëndrimit dhe qasje të re për këtë çështje. Megjithatë, ai tha se Turqia është duke bërë përgatitje dhe po i shqyrton të gjitha opsionet ndaj sanksioneve të mundshme amerikane për blerjen e sistemit.

Akar gjithashtu tha se personeli ushtarak i Turqisë është duke kryer trajnime për përdorimin e sistemit mbrojtës raketor “S-400”. Në anën tjetër, Uashingtoni ka thënë se do ta tërheqë ofertën për t’ia shitur Turqisë sistemin mbrojtës “Patriot”, shkruan “Free Europe”.

Loading...