Shqiptarja Almira Sallovic nga Ulqini, është femra e parë zjarrfikëse në Mal të Zi. Ajo ka thënë se kjo punë e ka bërë më të fortë atë, sepse është ballafaquar me raste nga më të rëndat.

“Tash e tetë muaj ushtroj profesionin e zjarrfikëses. Është një punë që e bëj me plotë dëshirë e vullnet. Qysh në moshën e fëmijërisë ëndërroja të isha një zjarrfikëse, por Ulqini ishte vend i vogël dhe pothuajse asnjë zjarrfikëse në tërë Malin e Zi nuk e gjeje. Pasi mbarova shkollën e mesme më pëlqenin më shumë punët e meshkujve. U regjistrova në fakultet në drejtimin për police por sapo mbarova vitin e parë u punësova në këtë profesion ku jam edhe sot”, tregon për RTV Dukagjinin, Allmira Sallovic.

21-vjeçarja, hoqi dorë edhe nga profesioni që prindërit e saj ëndërronin, për t’iu bashkuar zjarrfikësve të Ulqinit, duke mos e ndalur rrugën që ajo kishte nisur.

“Sigurisht pa përkrahjen e familjarëve nuk do ia kisha dalë. Në fillim më thoshin: ‘sa do mund të ia dalësh’, ‘mos rreziko!’, ‘je një femër’, ‘je e para në Mal të Zi’, ‘Ulqini është një vend i vogël’, etj. Kur e panë që unë nuk heq dorë, më mbështetën atëherë dhe sot. Në Mal të Zi më kanë pritur shumë mirë. Janë habitur pak, por më kanë përkrahur”, tregon më tej Almira.

Të qenit zjarrfikëse është profesion human, por në të njëjtën kohë edhe shumë sfidues. Por, për Almirën të rrezikohet jeta për të shpëtuar dikë tjetër, është më shumë se kënaqësi.

“Vështirësitë e kësaj punë janë shumë. Por edhe të mirat e kësaj pune janë shumë. Vështirësia është shumë e madhe kur në pyetje është ta shpëtosh ndokënd. Nuk është në pyetje vetëm zjarri por edhe aksidentet që ndodhin duhet ndërhyrja. Nga momenti që kam vendosur ta vesh këtë uniformë e kam ditur që më presin vështirësi të mëdha”, tha ndër të tjera Allmira Sallovic.

Ajo thotë më tej se secili nga ne duhet të ndjekë atë që dëshiron, në mënyrë që të jetojmë të lumtur, pavarësisht kritikave dhe vështirësive që na ofron jeta.

Loading...
Global