Qytetarët pa nënshtetësi, do të vazhdojnë t’i nënshtrohen testimit të gjuhës maqedonase. Tani për tani, këtë nuk e ndryshon as Ligji për përdorimin e gjuhëve. Zëvendëskryeministri Bujar Osmani tha se nesër do të bisedohet edhe për këtë çështje.

Të shtunën grupi i punës do të bëj plan veprimin dhe aty do përcaktohen edhe çështja e Ligjit për nënshtetësi të RM-së. Kjo çështje tani është e rregulluar me ligjet në kuadër të MPB-së. Të gjitha ligjet, duhet të harmonizohen me Ligjin për gjuhët në afat të paracaktuar me ligj në kuadër të normave kalimtare- deklaroi Bujar Osmani, Zëvendëskryeministër.

Në Ligjin për nënshtetësi të RM-së, përveç tjerash thuhet se banorët e huaj mund të bëhen shtetas të Maqedonisë edhe me procedurën e natyralizimit. Sipas nenit 7, pika 6 e këtij ligji thotë se njëri nga kushtet është edhe njohja e gjuhës maqedonase.

Ligji për nënshtetësi të RM-së

Për shtetësinë e RM-së me natyralizim mund të aplikoj një i huaj, që personalisht ka parashtruar kërkesë për ta marr nënshtetësinë dhe të njëjtit duhet ta zotërojnë gjuhën maqedonase deri në atë shkallë që mund të jetë e kuptueshme në mjedisin ku do të jetojnë- (VIZART) Ligjit për nënshtetësi të RM-së.

Nga kabineti i kryetari të Kuvendit thonë se e gjithë përgjegjësia e tyre juridike është kryer në momentin e paraqitjes së Ligjit për përdorimin e gjuhëve në gazetën zyrtare. Kreu i legjislativit Talat Xhaferi, mbrëmë në emisioni “Rruga drejtë” tha se tani iu takon institucioneve shtetërore dhe publike të zbatojnë të njëjtin përmes akteve nënligjore, por jo vetëm në aspektin teknik.

Besoj se qytetarët maqedonas nuk pajtohen në atë pikë që të trajtojnë gjuhën maqedonase si gjuhë teknike. Po të ishte ashtu, përse 3 dekada u bënë përpjekje me Greqinë për të tejkaluar të gjitha ato dallime për aspektet nacionale e etnike- deklaroi Talat Xhaferi, Kryetar i Kuvendit.

Sipas të dhënave zyrtare të MPB-së, mbi 2900 persona aktualisht kanë paraqitur kërkesën për marrjen e nënshtetësisë së RM-së. Nga Ministria e brendshme bëjnë të ditur se që nga pavarësia e shtetit, mbi 100 mijë qytetarë kanë marrë nënshtetësinë, rreth 8 mijë të tjerëve iu janë refuzuar kërkesat dhe mbi 30 mijë kanë hequr dorë nga shtetësia e Maqedonisë.

Adnan Qaili