Mbrojtësi brazilian i Chelseat, David Luiz, ka thënë se mediat e mbivlerësojnë varësinë e klubit londinez nga ylli belg, Eden Hazard, duke thënë se në skuadrën e klubit ka shumë lojtarë të mirë dhe nuk është vetëm Hazardi.

Chelsea arriti të sigurojë fitore me rezultat 4-2 në ndeshjen kundër Burnleyt dje në Turf Moor. Paraqitja dhe rezultati i mrekullueshëm i kësaj ndeshje ka dëshmuar se skuadra e Maurizio Sarrit mund të fitojë edhe pa Hazardin, transmeton Gazeta Express.

Kjo është ndeshja e dytë radhazi që Hazardi mungon për shkak të një lëndimi që kishte marrë gjatë ndeshjes me Manchester Unitedin. Për shkak të ndërhyrjeve të shpeshta, belgu kishte pësuar lëndim në shpinë.

David Luiz beson se Chelsea e ka dëshmuar se mund të mbijetojnë pa belgun, pasi që ka thënë se në skuadër kanë shumë lojtarë të talentuar, si Alvaro Morata dhe Ruben Loftus-Cheek.

“Kemi shumë lojtarë të talentuar këtu, jo vetëm Edenin. Çdo lojtar këtu është i mirë. Edhe kur e humbëm Pedro në dhjetë minutat e parë të ndeshjes dhe hyri Ruben Loftus-Cheek. Kemi edhe lojtarë të tjerë të talentuar”, ka thënë Luiz.

“Ky është një klub i madh dhe kur je në një klub të madh, nuk mund të luash me vetëm 11 lojtarë. Duhet t’i kesh një minimum prej 18 apo 19 lojtarëve të cilët janë të gatshëm të luajnë dhe ne jemi të lumtur sepse kemi më shumë se 20”.