Presidenti i Republikës së Shqipërisë, Ilir Meta dhe  zëvendës-ndihmësja e sekretarit amerikan të Shtetit, Elisabet Millard, në takimin e sotëm në Tiranë, mes tjerash biseduan edhe për referendumin në Maqedoni, të caktuar për më 30 shtator.

Qëndrim i përbashkët i dy bashkëbiseduesve është se rezultati pozitiv i referendumit është i rëndësishëm për ardhmërinë evropiane, jo vetëm për Maqedoninë, por edhe për tërë rajonin.

Duke u përqendruar edhe në çështje tjera nga ngjarjet në Ballkan, Meta dhe Milard këmbyen mendime edhe rreth dialogut Kosovë-Serbi.

“Me rëndësi është finalizimi i dialogut Kosovë-Serbi përmes marrëveshjes. Marrëveshja Kosovë-Serbi garanton perspektivën evropiane, konsolidon bashkëjetesën ndëretnike dhe paqen në rajon”, është shprehur Meta.

Gjatë takimit, bashkëbiseduesit vlerësuan rëndësinë e ecurisë së reformave për përforcimin e shtetit juridik me qëllim konsolidimin e ligjit dhe integrimin evropian.

Meta e garantoi zyrtaren amerikane se Shqipëria është e vendosur në përmbushjen e detyrimeve që burojnë nga dokumenti i Partneritetit Strategjik Shqipëri-SHBA.