Reperja e re e muzikës shqiptare, Rina Balaj, ka vetëm pak ditë që ka publikuar projektin e saj më të ri muzikor, i cili është një bashkëpunim me Sin Boy.

E titulluar “Gigi”, kjo këngë është bërë pjesë e klasifikimit të “The Top List” falë sugjerimeve të shumta nga ana e publikut, ku për këtë javë renditet në vendin e 78-të.

Përveç Rinës, ai që e ka bërë të veçantë këtë prurje të re është Sin Boy, një tjetër reper i talentuar.

Sin Boy, emri i vërtetë i të cilit është Agustin Gega, është një reper me origjinë shqiptare që jeton në Greqi.

Ai ka nisur të merret me muzikë që në moshën 18-vjeçare, por pavarësisht se në Shqipëri nuk është shumë i njohur, Sin Boy është tepër i famshëm në Greqi, falë disa projekteve muzikore si “Mana,” “Gang,” “High” e “Draco”.

Para se të bëhej i famshëm, reperi kishte zgjedhur kanalin e vet në YouTube për të shpërndarë muzikën e tij.

24-vjeçari ka vendosur që karrierën e tij muzikore ta zhvillojë edhe në trevat shqiptare dhe artisti ka zgjedhur shtëpinë diskografike të ZzapnChriss për të bashkëpunuar.

Rina dhe Sin Boy kanë bashkuar fuqitë për “Gigi”, ku ky i fundit ka zgjedhur të këndojë në gjuhën greke.