Integrimi i rajonit në BE dhe në NATO është shumë i rëndësishëm dhe vital për të ardhmen, thotë presidenti shqiptar Ilir Meta në intervistën për “Albanian Daily News” duke iu përgjigjur pyetjes lidhur me referendumin në Maqedoni.

“Maqedonia për momentin është në një moment të favorshëm dhe optimist pas zgjidhjes së kontestit me Greqinë. Pa hezitime ne e kemi mbështetur dialogun mes Athinës dhe Shkupit, duke qenë të bindur kjo është rruga e duhur për të lëvizur përpara dhe për të gjetur zgjidhje për integrimin e Maqedonisë”, tha mes të tjerash Meta.

Sipas tij, faktori politik shqiptar në Maqedoni ka pasur rol të pazëvendësueshëm në procesin e transformimit të brendshëm social dhe politik, si dhe për integrimet e Maqedonisë në organizatat euroatlantike.

Meta është i mendimit se referendumi i suksesshëm do të konfirmonte fitoren e të gjitha forcave politike të cilat janë të orientuara drejt Evropës.

Meta gjithashtu ju bëri thirrje shqiptarëve të Maqedonisë që të marrin pjesë në referendumin e 30 shtatorit dhe të votojnë “pro” marrëveshjes me Greqinë, e cila sipas tij, do të hapë kapitull të ri të integrimit të Maqedonisë.