Kryeministri i Kosovës, Ramush Haradinaj pas takimit me ambasadorin Greg Delawie tha se marrëveshje ndërmjet Kosovës dhe Serbisë nuk guxon të përfshijë lëvizje të kufijve.

Ai tha se SHBA mirëpret një marrëveshje Kosovë-Serbi, me njohje të Kosovës.

Sipas shefit të ekzekutivit, të gjithë bashkë duhet të bien dakord që duhet të ndodhë dialogu dhe të arrihet marrëveshje, por siç tha kjo marrëveshje nuk guxon të përfshijë lëvizje të kufijve.

Ndryshe, Thaçi sot në një postim në rrjetin social Facebook ka kritikuar opozitën, për siç tha “propagandën kundër aleatëve”.

“Nuk ka fatkeqësi më të madhe për shtetin dhe qytetarët e Kosovës kur disa parti opozitare apo individë e vendosin në pikëpyetje përkrahjen e SHBA-së dhe aleatëve tanë kryesorë. Kjo situatë është për keqardhje”, tha Thaçi.

“Kjo propagandë e paskrupullt e partive opozitare kundër aleatëve tanë ndërkombëtarë, e mbështjellë me panikun për gjoja cenimin e sovranitetit shtetëror, është e rrezikshme dhe e turpshme”, tha mes tjerash Thaçi.