Pas kongresit të së dielës të njërit krah të Lëvizjes Besa, e cila zgjodhi Afrim Gashin për kryetar të partisë, një tjetër kongres po i kësaj partie do të mbahet më 24 shkurt, paralajmëroi krahu i Bilall Kasamit.

Në këtë kongres do të marrin pjesë gjithsej 505 delegatë, ndërsa të drejtë për të konkurruar për kryetar të partisë e kanë të gjithë delegatët që do të mbledhin nënshkrimet e nevojshme.

“Për hir të transparencës të të gjithë këtij procesi, sot para jush shpallim të hapur edhe afatin për dorëzimin e kandidaturave për kryetar të partisë. Meqë dihet lista e delegatëve, ne i inkurajojmë të gjithë kandidatët që konform normave statutore të bëjnë grumbullimin e nënshkrimeve dhe të garojnë për postin e kryetarit të partisë. Çdo kandidat mund të konkurrojë duke grumbulluar së paku 1/10 e nënshkrimeve të delegatëve dhe të njëjtat t’i dorëzojë te Komisioni për organizimin e kongresit. Verifikimi i kandidaturave do të bëhet në ditën e kongresit nga ana e komisioneve përkatëse”,- deklaroi zëdhënësi i Lëvizjes Besa – krahu i Tetovës, Abdush Demiri.

I pyetur të komentojë kongresin e 18 shkurtit, Abdush Demiri  vlerësoi atë aktivitet partiak të një subjekti politik tjetër, duke thënë se partitë politike kanë të drejtë të organizojnë vetëm një kongres.

“Nuk komentojmë tubimet e subjekteve tjera. Jemi këtu për të rikonfirmuar qëndrimet e Lëvizjes Besa. Lëvizja Besa mund të ketë vetëm një kongres dhe ai është më 24 shkurt në Shkup”,- u shpreh zëdhënësi i lëvizjes Besa – Krahu i Tetovës, Abdush Demiri.

Demiri tha se pas mbarimit të kongresit të gjithë dokumentacionin në lidhje me të njëjtin do ta dorëzojnë në gjykatë.