Kryesia e Kuvendit të Republikës së Kosovës, sot, në mbledhjen e përbashkët me kryetarët e grupeve parlamentare, të drejtuar nga Kadri Veseli, kryetar, caktoi seancën e radhës të Kuvendit.

Kryesia njëzëri vendosi që Kuvendi të mblidhet të premten, në orën 13:30, në të cilën deputetëve do t’u adresohet Presidenti i Republikës së Kosovës, Hashim Thaçi.

Ndërkaq lidhur me caktimin e seancës për shqyrtimin e dytë i Projektligjit për Buxhetin e Republikës së Kosovës për vitin 2018, Kryesia nuk gjeti pajtim.

Në mbledhjen e sotme, Kryesia e Kuvendit shqyrtoi edhe çështje të tjera nga fushë veprimtaria e saj.

Kështu, u kërkua nga grupet parlamentare që të procedojnë sa më shpejtë me propozimin e emrave për kompletimin e Komisionit Parlamentar për Stabilizim-Asociim dhe  delegacionit të Kuvendit në Asamblenë Parlamentare të Procesit të Bashkëpunimit për Evropën Juglindore – SEECP.