Partia Demokratike e Kosovës dhe Lidhja Demokratike e Kosovës, kanë dorëzuar sot në Gjykatën Supreme ankesat lidhur me vendimin e fundit të PZAP-së.

PDK ka dorëzuar tri ankesa ndërkaq LDK ka dorëzuar vetëm një ankesë. Këtë e ka konfirmuar për Telegrafin, zëdhënësja e Gjykatës Supreme, Antigona Uka-Lutfiu.

“Po janë dorëzuar katër ankesa gjithsejtë. Tri janë nga PDK dhe një nga LDK”, ka thënë Uka-Lutfiu.

Anëtari i Kryesisë së PDK-së, Blernad Stavileci ka konfirmuar për Telegrafin, dorëzimin e tri ankesave në Gjykatën Supreme.

“Për tri komunat kemi dërguar ankesë në Gjykatën Supreme, pra për Prizrenin, Rahovecin dhe Klinën”, ka thënë shkurt Stavileci.

Edhe Florian Dushi nga LDK, ka konfirmuar për Telegrafin dorëzimin e ankesës në Supreme lidhur me vendimin e PZAP-it.

“Po, sot i jemi drejtuar Gjykatës Supreme me ankesë që të ndryshoj vendimin e PZAP-it në kuptimin e lejimit të rinumërimit, i cili do të ngërthente në vete edhe procesin e shqyrtimit të fletëvotimeve të pavlefshme, si mekanizëm i vetëm i ligjshëm dhe i domosdoshëm për sqarimin dhe evitimin e shkeljeve të evidentuara nga ana e jonë”, ka thënë Dushi.

Ai ka treguar se ankesa është për vetëm për Prishtinën.

Ndërkaq PZAP në vendimin e marrë dje, ka refuzuar ankesat e PDK-së për Prizren, Rahovec dhe Klinë në lidhje me rezultatet përfundimtare të raundit të dytë të zgjedhjeve.

PZAP po ashtu në këtë vendim ka refuzuar edhe ankesat e LDK-së për Prishtinë, Dragash dhe Kamenicë.

Gjykata Supreme duhet te vendos lidhur me ankesat brenda 72 orëve.