Kryebashkiaku Erjon Veliaj tha: “I shërbejmë Tiranës për ta çuar akoma më përpara, aktivitete të shumta festive për festat e 28-29 Nëntorit”

Tirana përkujtoi sot 105 vjetorin e ngritjes së flamurit, ditë kur patriotët Refik dhe Hamit Toptani, i’u bashkuan arkitektit të pavarësisë së Shqipërisë, Ismail Qemalit, në projektin që solli lindjen e shtetit shqiptar. Në sheshin para selisë së sotme të Kuvendit të Shqipërisë, aty ku 105 vite më parë burra dhe gra patriote tiranase ngritën flamurin tonë kombëtar, kryetari i Bashkisë së Tiranës, Erion Veliaj, nënkryetarja e Kuvendit, Vasilika Hysi, prefektja e Tiranës, Suzana Jahollari, kreu i Këshillit të Qarkut, Aldrin Dalipi, përfaqësues të komuniteteve fetare, veteranë lufte dhe qytetarë të Tiranës, vendosën kurora me lule në monumentin që simbolizon këtë moment historik për qytetin.

Kryetari i Bashkisë së Tiranës, Erion Veliaj uroi qytetarët e Tiranës për festën e pavarësisë, duke theksuar se ky akt i atdhetarëve tiranas 105 vite më parë tregoi se Tirana ka qenë gjithmonë një qytet pararojë. “Gëzuar festën e pavarësisë së Tiranës në këtë ditë të bukur. Tirana gjithmonë ka qenë avangard. Me sa duket, kjo qenka shkruar në histori. Tirana ka shpallur pavarësinë dy ditë përpara pavarësisë së Shqipërisë, edhe për faktin se ishin zonat ende të pa pushtuara dhe të parrethuara nga armiqtë, ndërkohë që armiqtë po i afroheshin Krujës, e pastaj Durrësit, më pas Vlorës”, tha Veliaj.

Ai u shpreh se ditë të tilla duhet të shërbejnë për të kuptuar se, ashtu si patriotë të qytetit të Tiranës 105 vite më parë morën përsipër të shpallnin pavarësinë e Tiranës, ashtu edhe sot qytetarë të saj duhet të shërbejnë për ta çuar Tiranën akoma më përpara në betejat e tjera me të cilat përballet sot njerëzimi, siç është varfëria. “Unë besoj se sot thirrja është të vazhdojë të jetë në avantgardë, edhe për pavarësi të tjera, për pavarësinë nga varfëria, nga injoranca dhe besoj që Tirana do të vijojë të jetë kryeqytet jo vetëm i Shqipërisë, por edhe i gjithë shqiptarëve. Më vjen mirë që kauza shqiptare sot është me fortë se kurrë dhe të gjitha burojnë nga energjia e Tiranës. Nëse kemi një kryeqytet që vazhdon me punë, një kryeqytet që vazhdon me entuziazëm, që vazhdon me optimizëm, kjo reflektohet kudo”, shtoi Veliaj.

Kryebashkiaku i uroi festat kombëtare edhe të gjithë shqiptarëve që jetojnë sot jashtë kufijve të Shqipërisë. “Për të gjithë bashkatdhetarët tanë që po përgatiten të festojnë në çdo cep të botës, nga Kanadaja deri në Australi, në të gjithë Evropën, SHBA, dua t’u uroj festa të mbara dhe të kujtojmë që në fakt nuk jemi këtu nga rastësia, por jemi produkt i burrave dhe grave që kanë bërë çmos në pikat më kritike, në momentet më të vështira të vendit për të marrë vendime të drejta për vendin. Do të vazhdojmë të marrim vendime të drejta për Tiranën”, u shpreh Veliaj.

Ai bëri të ditur gjithashtu se kryeqyteti ka rezervuar për të gjithë qytetarët e Tiranës, por edhe për të gjithë ata që festat e nëntorit do t’i kalojnë në Tiranë, një sërë aktivitetesh historike dhe festive dhe që do të kulmojnë me Natën e Bardhë. “Do të vijomë me festimet në 28 nëntor, me ngritjen e Flamurit, në orën 10.00 paradite, ku ftoj të gjithë qytetarët të bëhen pjesë. Për herë të parë ngremë flamurin në sheshin e ri “Skënderbej”, pastaj gjatë gjithë ditës, do të kemi një sërë aktivitetesh. Nata e Bardhë do të rikthehet fuqishëm në Tiranë. Kemi koncerte, aktivitete të ndryshme, ndaj ftoj të gjithë qytetarët të bëhen pjesë e kësaj energjie të Tiranës, për të kujtuar të parët tanë dhe për të kujtuar premtimin që i kemi bërë kësaj toke, që sa të kemi mundësi, pavarësisht pozicionit, secili të bëjë të pamundurën për t’i shërbyer vendit”, tha kryetari i Bashkisë së Tiranës.

Kreu i Qarkut të Tiranës, Aldrin Dalipi theksoi se kjo datë do të duhet të jetë një mësim për gjithë brezat që t’i kujtojmë ata dhe t’i vlerësojmë. “U urojmë gjithë qytetarëve festën e flamurit. Është një ditë e shënuar që na kujton që ky qytet në themelet e tij ka punën, pasionin forcën dhe kurajon e atyre burrave, të cilët në datë 26 Nëntor të 1912-s ngritën flamurin në Tiranë dhe iu bashkuan Ismail Qemalit në Vlorë, madje dhe në qeverinë e tij. Kjo do të duhet të jetë një mësim për gjithë brezat që ne t’i kujtojmë ata dhe t’i vlerësojmë. Tirana është ngritur mbi sakrificën, përkushtimin, mirësinë dhe fisnikërinë”, deklaroi Dalipi.

Prefektja e Tiranës, Suzana Jahollari, vlerësoi sakrificat dhe vizionin e atyre të cilët kanë kontribuar për pavarësinë e Tiranës, ndërsa theksuan se Tirana mbetet pikë referimi për gjithë kombin. “Ne kujtojmë me nderim dhe përkulje burrat e Tiranës, të cilët patën guximin, kurajon dhe vizionin që të parashikojnë të ardhmen. Sot Tirana është e bukur, sot Tirana jonë mbetet dhe do mbetet për gjithë kombin pikë referimi për t’u bërë më mirë”, tha Jahollari.