Policia e Fierit arrestoi dje një 22-vjeçar për marrëdhënie seksuale me të mitur, pasi u kap në banesën e tij me një vajzë 13 vjeçe. Sipas Policisë, Oltjon B., banues në Kallm, Fier, është kapur në flagrancë duke kryer marrëdhënie seksuale me 13-vjeçaren A.L., për të cilën ishte vënë në alarm familja e saj.

Ngjarja ndodhi rreth orës 22:30 të së enjtes, në fshatin Kallm i Madh, ku i riu u gjet bashkë me të miturën. Kjo e fundit ishte larguar nga banesa disa orë më parë dhe pasi nuk është kthyer në banesë dhe nuk u përgjigjej thirrjeve të familjarëve të saj, ata kanë sinjalizuar Policinë.

Blutë mbërritën në vend dhe morën në pyetje familjarë të së miturës, nëse kishin ndonjë dyshim. Ata i deklaruan Policisë se kishin dyshime të forta se vajza e tyre ndodhej me një djalë të fshatit. Ata dyshonin gjithashtu se 13-vjeçarja ishte e lidhur me shtetasin Oltjon B. Pas kësaj, Policia është nisur në banesën e 22-vjeçarit, i cili është gjetur në momente intime me të miturën.

Kur blutë mbërritën në vend, ai nuk kishte asnjë nga familja e tij në shtëpi, çka duket se është shfrytëzuar për të marrë në banesë bashkëfshataren. Ai është arrestuar menjëherë, ndërsa ka tentuar të shfajësojë marrëdhënien me të miturën, me faktin se ata duheshin dhe se do të fejoheshin.

“Nuk kam abuzuar me të. E dua vajzën dhe ne do të fejohemi. Nuk e kam marrë me dhunë, ajo erdhi vetë këtu dhe unë e kam trajtuar mirë. Po të doni pyeteni edhe vajzën”, është shprehur i riu, teksa Policia e ka vënë atë në dijeni se marrëdhënia me të mitura ishte e jashtëligjshme.

Ndërkohë, e mitura është marrë në pyetje në prani të një psikologu si dhe të një punonjësi social. 13-vjeçarja ka thënë për Policinë se nuk ka ikur nën presionin e askujt.

Ajo ka pohuar të njëjtën gjë si djali, duke u shprehur se ata të dy kishin rreth një vit që ishin të lidhur dhe se kishin qëllime serioze me njëri tjetrin.

“Unë kam ikur vetë nga shtëpia. Rreth orës 20.00 ika për t’u takuar me të dashurin tim dhe nuk e di pse na erdhi Policia e na gjeti në shtëpinë e tij. Ne ikëm në atë orë sepse ai nuk kishte njerëz në shtëpi dhe menduam se ishim me qetë. Unë e dua dhe ai më do. Mua më lindi ideja që të iknim”, është shprehur e mitura në prani të dy eksperteve të fushës së psikologjisë.

Pas arrestimit të 22-vjeçarit, Policia ia ka kaluar dosjen për kompetencë Prokurorisë pranë Gjykatës së Shkallës së Parë Fier. /Panorama/