Kreu i Grupit Parlamentar i Lëvizjes Socialiste për integrim i ftuar në “ABC News” ka komentuar deklaratat e forta të bëra nga Ambasadori Donald Lu dy ditë më parë.

Ai e ka quajtur të drejtpërdrejtë gjuhën e përdorur nga ambasadori Lu dhe gjithashtu thekson faktin se këto deklarata i ka pritur më herët.

“Besoj se gjuha e ambasadorit Lu, ka qenë plotësisht e drejtpërdrejtë, e kemi pritur me kohë një deklaratë të tillë. Sigurisht do të kishte qenë akoma më mirë të ishte artikuluar para mbajtjes së zgjedhjeve, sepse zgjedhjet u shënjuan nga influenca e bandave dhe kriminelëve, gjë që ne e bëmë publike që në datën 27 qershor, dy ditë pas zgjedhjeve, shprehet Vasili.

Vasili, cili është opinioni juaj i deritanishëm se për ecurinë e procesit të vetingut?

Unë kam pasur mundësinë të shprehem disa herë publikisht për këtë problematikë, jo vetëm në media, në rrjete sociale, por edhe në sallën e Parlamentit. Jam shumë i shqetësuar, por njëherazi dhe i keqardhur, ndonëse e dyta është një karakterizim më tepër moral, jo politik, pasi duke qenë dhe një anëtar i atij komisioni, që ideoi reformën në drejtësi, ku zemra se procesit qe vetingu, shikoj me keqardhje se si po rrënohet kjo ide e cila lindi si ide shumë pozitive, do të thosha, për të pastruar sistemin e drejtësisë, për ti dhënë një tjetër pamje, për ti dhënë një kredo të re morale në radhë të parë, sepse ky është një ndër raportet edhe moral me qytetarët. Ishte në radhë të parë dhe mbi të gjitha një marrëveshje e madhe politiko-kushtetuese sepse dihet se përveçse një marrëveshje e tillë, asgjë tjetër nuk mund ta legjitimonte vetingun. Pasi dihet që vetingu ishte një zgjidhje shumë e fortë, në kufijtë e kushtetueshmërisë, pra jo 100 % kushtetuese dhe si e tillë kërkonte pikërisht këtë lloj ecurie. Dhe së fundi, për ta mbyllur, marrëveshja e madhe ishte që, asgjë nuk ka asnjë rëndësi dhe çdo çmim vlen për të siguruar më në fund një sistem drejtësie. Sot jemi në një situatë shumë të thjeshtë, qeveria ka futur duart në këtë çështje në mënyrë të dhunshme.

Pse, vetëm sepse është shkurtimi i aspektit të buxhetit apo e keni dhe te përzgjedhja e njerëzve?

Procesi nuk është çështje shkurtim apo jo shkurtim buxheti. Këto institucione janë të pavarura dhe u është dhënë dhe statusi i njëjtë me Gjykatën Kushtetuese të Shqipërisë, pra kanë të drejtën të planifikojnë në mëvetësinë e tyre, pra në pavarësinë e tyre, të ndërtojnë në raport me legjislacionet dhe në raportet e institucioneve simotra, përbërjen e tyre, dhe ne, qeveria, politika, kemi bërë një marrëveshje që do ua sigurojmë të gjitha dhe nuk do të fusim duart. Futja e duarve, që të gjithë këta burra e gra të cilëve u kemi besuar vetingun e Shqipërisë nuk janë më të zotë të ndërtojnë strukturat e tyre, pra këtë keni kuptuar ju: këta nuk dinë të ndërtojnë, këta planifikojnë më kot, këta zbatojnë standarde që nuk gjenden gjëkundi. Këtë gjë ne e kemi rrëzuar nëpërmjet politikës.

Në qoftë se do kenë nevojë, thotë mazhoranca, le të vijnë dhe të na kërkojnë por, ne mendojmë që ky buxhet që po ju japim, kjo organikë që po ju diktojmë, mjafton…

I kam dhënë përgjigjen mazhorancës, por ju në mënyrë metaforike e rimorët, po ju kthej dhe një përgjigje tjetër. Praktikisht, këto organike përdorin standarde të njëjta me operacionin e monitorimit ndërkombëtar, bile pak më të ulëta, nuk janë ato standardet. Atëherë çfarë duam të ndërtojmë? Një veting të pazotë, të pamjaftueshëm apo na duhet një veting që të funksionojë në mënyrë optimale? Besoj që kërkesa edhe e imja, por edhe e juaja si qytetare, e prisni këtë gjë, e keni dëgjuar që janë shpenzuar lumenj fjalësh për vetingun. Doni një veting që funksionon pse jo, perfekt. Ne çfarë bëjmë? Ne i themi do të shkurtojë qeveria. Ky nuk është institucion i qeverisë, nuk është ministri e qeverisë, nuk është Drejtori e Përgjithshme e qeverisë, nuk janë polici që shkurton dhe rregullon kryeministri. Është institucion i pavarur. Tani, nëqoftëse qeveria ka pamundësi të jetojë në këtë pavarësi, do të fusë duart, ne kësaj i themi ndal. Për këtë arsye u drejtohem edhe ambasadorëve, për këtë arsye Kryetarja e LSI u është drejtuar kaherë ambasadorëve. Ky shqetësim është madhor, o kemi një mekanizëm që funksionon në të tërë elementët e tij kushtetues, organizativ, administrues të procesit, në pavarësinë e tij dhe prodhon rezultatet që të gjithë i presin, ose në të kundërt është një zgjatim i qeverisë (riciklim i asaj drejtësie që nuk e besojmë, pro në një formë të re, akoma më të keqe se më parë).

Keni ndonjë kontestim për emrat e përzgjedhur?

Nuk futem fare unë në këtë proces. Çdo proces i cili respekton ato elementë ligjor, të cilët të gjithë i votuam dhe i pranuam, janë për mua të mirëpritur. Momenti kur politika fut duart aty ku nuk i lejohet, aty për mua procesi ka rënë dhe është i pabesueshëm. Ky është një qëndrim shumë i prerë dhe shumë i thjeshtë. E kam shqetësimin dhe zemërimin shumë herë më të madh, pasi dihet një gjë publikisht që, kjo nismë, përsa i takon pjesës së futjes së procedurave ka qenë e kushtëzuar nga një votë përcaktuese dhe vota e LSI nëpërmjet meje, sepse unë isha përfaqësues, por dhe ligji në Parlament i vetingut i cili ka kaluar me ato vota që LSI dha në atë kohë për të siguruar 84 votat. Ndiej një zemëratë të madhe por dhe një përgjegjësi të madhe që ky proces tek i cili besuam shumë, shohim që po na rrënohet përpara duarve.

Kjo do të thotë që ju nuk do t’i njihni rezultatet që do të japë vetingu nën këto kushte?

Vetingu dhe emri Lori ka një problem shumë të madh, nuk dihet se ç’rezultate do të prodhojë në pamundësinë e funksionimit të tij. Pasi i kemi thënë vetingut dhe institucioneve që do të funksiononi me shumë më pak resorso (burime) se çfarë kërkoni, dhe natyrshëm çfarë rezultatesh do prodhojë? Më e pakta do jetë një rezultat i pamjaftueshëm, më e keqja një rezultat i pabesueshëm.

Ndalemi te deklarata e fortë e ambasadorit amerikan, z. Donald Lu ka thënë, janë katër klane kriminale që drejtojnë Shqipërinë. Cili është opinioni juaj?

Besoj që gjuha e ambasadorit Lu ka qenë absolutisht e drejtpërdrejtë. E kemi pritur me kohë një deklaratë të tillë. Sigurisht do kishte qenë akoma më mirë, pse jo të ishte artikuluar përpara mbajtjes së zgjedhjeve. Pasi zgjedhjet e fundit u shënjuan nga influenca e bandave dhe kriminelëve, gjë që ne e bëmë publike që në datën 27 qershor, dy ditë pas zgjedhjeve. Ku unë, si kryetar i LSI në atë kohë, i kam konsideruar si zgjedhjet më të shëmtuara dhe një reminishencë e zgjedhjeve të ’96-’97. Deklaratat e z. Lu provojnë që kishim absolutisht të drejtë, provojnë që është ndërtuar një mazhorancë që i ka rrënjët te krimi dhe kriminelët, të cilët jo vetëm nuk i ka luftuar, por edhe ka bashkëpunuar me ta, gjë që u pa haptazi në zgjedhjet e 25 qershorit. Dhe në këtë mënyrë ka vënë në një pasiguri të madhe jetën, pronën e qytetarëve dhe sigurinë e vendit. Pasi ku pushtetin e kanë bandat dhe nuk e ka më shteti, kur policia tërhiqet apo ndihet e tradhtuar në luftën e saj në terren dhe kriminelët triumfojnë, ku SHBA-të janë të shqetësuara kaq shumë (sepse ky nuk është shqetësim i ambasadorit Lu, është një shqetësim që vjen nga përtej oqeanit), do të thotë që kemi një situatë kritike ku ka një përgjegjës dhe ka një emër, përgjegjësia kryesore, individuale, e vetme, është e kryeministrit të vendit dhe nuk ka përgjegjësi tjetër.

Nuk keni përgjegjësi ju që keni qenë në qeveri me kryeministrin e vendit?

Ka pasur deklarata shumë kohë më parë të z. Luan Rama, të cilat janë përcjellë dhe ndodhen në arkivat tuaj, sistematike, prej gati një vit e gjysmë më parë. Keni përcjellë deklarime të miat gjithashtu. Ka pasur një kulmim të z. Koka në disa ngjarje konkrete. Pra, ai ka qenë një shqetësim në rritje që ne kemi pasur, gjë që përcaktoi dhe atë raport politik të qartë tonin në kohën e fushatës elektorale, të një ndarje me një kupolë qeveritare e cila ishte bërë njësh me krimin. Ju e dini shumë mirë që, marrëdhënia që kishte të bënte me policinë, me kontrollin e drogës, e të gjitha, ishin një ekskluzivitet absolut i PS, i kryeministrit dhe i ministrave në atë kohë. Ju e dini fare mirë që nuk ka pasur asnjë lloj përfaqësimi politik, saqë dhe një përfaqësim simbolik që ne kishim një zëvendësministër, u godit nga drejtuesit e atëhershëm që asnjë sy dhe kurrkush të mos ishte në këto struktura. Pra do të thotë që ka qenë një përgjegjësi 100 % e zotëruar, e keqadministruar në mënyrën më të keqe të mundshme nga PS. Dhe sot, natyrshëm do të vuajë konsenguencat, që për fat të keq janë konsenguenca që i vuan vendi dhe qytetarët.

Njerëzit që kanë ndjekur lajme kanë në memorien e tyre një emër, Klement Balili, i cili ka qenë pranë partisë tuaj…

Jemi prononcuar qartë për këtë çështje. Ju mbani mend, po ju i keni përcjellë, janë deklarime shumë të qarta të ish-ministrit Manjani, në atë kohë Ministër i Drejtësisë, dhe besoj se ka qenë krejtësisht e shteruar kjo çështje dhe besoj se është një temë që nuk ka asnjë lidhje as me LSI dhe as me fenomen tjetër. Kështu që, problemi i vetëm ishte ky, cilat ishin arsyet që ky njeri nuk u ndal? Kështu që problemi i vetëm ishte ky cilat ishin arsyet që ky njeri nuk u ndal nga policia e shtetit. E ka kërkuar ministri Manjani. Unë kam insistuar kur kam qenë ministër i Drejtësisë. Përgjegjësinë e policisë, përgjegjësinë e atyre që drejtuan policinë, që e drejtojnë sot e që mbajnë në grusht policinë, që i thanë policisë shko bëj vota por mos ruaj rendin publik, ata janë dhe ata që nuk donin të ndalonin e të kapnin një Klement Balili. Kjo është fare e qartë.

Për të gjitha gjetjet tuaja, jeni drejtuar ju prokurorisë, ambasadorëve? Gjetjet që ju mund të keni në lidhje me trafikimin e votës në zgjedhjet e 25 qershorit, me vjedhjen e votës, me drogën që është përdorur , kultivimi apo lekët e drogës, eurot e shumta të cilat janë rimbursuar në atë ditë me lekë shqiptare. Është një pretendim i juaj dhe i partisë suaj ky.

Më fal t’ju them një gjë. Eurot që tronditën dhe ekuilibrat financiarë janë një fakt i bërë publik nga Banka e Shqipërisë dhe ky është një fakt i paprecedentë në historinë e Shqipërisë e pluralizmit shqiptar së pari. Së dyti, ne kemi denoncuar dhe në formën e kallëzimit në mënyrë të drejtpërdrejtë kryeministrin, i cili bëri thirrje policisë të lërë punën dhe të merret me blerjen e votave. Besoj është mbi të gjithë faktet e tjera dhe ishte sinjal e mesazh i qartë që krimi le të bënte festë pasi policia nuk ka kohë të merret me ta, do bëj vota dhe në rastin më të keq akoma ku ka edhe dokumente dhe fotot të cilat janë depozituar edhe ditën e zgjedhjeve e më pas në Prokurori. Madje, unë kam marrë sigurime në kuptimin edhe nga përfaqësues të trupit diplomatik, të cilët besojnë që prokuroria do vazhdojë të ndjekë këto gjëra. Duhet të ndjekë besoj dhe kallëzimin e bërë ndaj kryeministrit për deklaratën shumë të rëndë publike që ai ka bërë atëherë në kohë, deklarata që s’ka precedentë. Ju s’keni rekordet tuaja në këto 24 vjet në deklaratë që t’i thuhet policisë lëreni punën tuaj e merruni me votat. Jo vetëm aq, por edhe gjithë denoncimet e tjera të cilët kanë qenë jo vetëm tonat, por kanë qenë edhe të vëzhguesve ndërkombëtarë të OSBE/ODIHR dhe të vëzhguesve amerikanë. Të gjitha janë depozituar dhe janë në Prokurorinë shqiptare. Sigurisht që është në tragetin e saj që të veproj për faktet të cilat në mendimin tim në disa raste kanë qenë flagrante dhe evidente. Kanë qenë kaq të shkujdesur dhe në mes të ditës.

Z.Basha ndoshta i frymëzuar nga deklarata e z. Lu, ka folur për një platformë të përbashkët opozitare, një nismë e cila do të jetë institucionale dhe ligjore tha z. Basha. Jeni në dijeni le të themi të një fronti dhe një aleancë opozitare dhe një aleancë me qytetarin?

Unë kam dëgjuar deklaratat e z. Basha të cilat në thelbin e tyre ndaj të njëjtën bindje që përpara një të keqe të përbashkët, një problemi të rëndë për shqiptarët i cili do të thellohet dhe agravohet, ne kemi përgjegjësinë ta ndalim pasi sigurisht ne nuk e ndalim dot opozitën. Ç’ ndodhi në vitin ’96, ama pasojat i vuajtëm të gjithë. Nuk besoj se pati shqiptar demokrat që qe i qetë në atë kohë dhe shqiptar socialist që vuante. Sigurisht, në këtë sfond sinkronizimi është gjithnjë e më i mirë i opozitës dhe është një sinkronizim dhe sinergji e cila ndihmon që problemet të kenë një barrierë shumë të fortë. Do ta bëjë qeverinë megjithëse kjo është një qeveri që është shumë e shurdhët e shumë arrogante, e kënaqur në dëmin që bën, të përpiqemi ta ndalim sa të jetë e mundur. Ndërkohë, nuk është çështja vetëm të ndalim por edhe krijimi i një ndjesie shumë të madhe të re qytetare, për një rrezik të madh që i kanoset vendit. Kjo është akoma dhe më e rëndësishme se puna që bëjmë ne si politikë sepse pa krijimin e kësaj ndjesie për shembull në qoftë se ju, kameramanët tuaj nuk përjetoni të tronditet malli që i vjen vendit, që ishte tronditje ekonomike e tronditje e rendit publik. Imazhet që ju jepni seç ndodh me përballjen e policisë dhe krimit kur policia tërhiqet, apo atë çfarë përcillet nga mediat e huaja që droga ka pushtuar vendin dhe tonelata të tëra kapen përditë, kemi vrasje të përditshme. Të gjitha këto elemente, ne kemi për detyrë t’i përcjellim si një ndjeshmëri të madhe publike të cilën kemi obligime ta udhëheqim politikisht. Kështu që, ky sinkronizim e kjo sinergji, bën që më në fund ajo që thuhet aleancë për qytetarin, të kthehet në realitet. Në rast se ne i bëjmë jehonë këtyre negativitete të mëdha që po tronditin vendin dhe ne po japim dhe alternativën tonë. Pra, jemi të gatshëm që jo vetëm të demaskojmë por do ta udhëheqim daljen nga kjo situatë e rëndë. Sigurisht, kjo siguron dhe rehatinë e qytetarëve. Kështu që, nuk ka një platformë të shkruar. Që të jemi të hapur me ju qefte se do kishim një tryezë apo një gjë, nuk do linin gjë pa marr vesh. Kështu që nuk mund të ndodhte që ne të kishim tryeza, të kishim platforma të cilat pse do t’i mbanim të fshehur.

Kanë bërë xhiron e rrjeteve takimi i znj. Kryemadhi dhe z. Basha. Duket sikur janë shkrirë dhe akujt mes LSI dhe PD në parlament…

E kam takuar dhe unë z. Basha në parlament, jo vetëm në një moment por kemi pasur dhe një komunikim tjetër në sallë lidhur me qëndrimet e votimit.

I gjithë ky komunikim që ne e lexojmë nga jashtë kështu, ju vetë do të ngrinit Si LSI një platformë të përbashkët për ta pasur jo vetëm për këtë situatë të rendit, por keni përpara reformën zgjedhore e ndryshimet e tjera kushtetuese. A do të ketë një front opozitar në parlament?

Përpara çdo gjejë tjetër, cili është raporti politik dhe moral në raport me këtë mazhorancë që i sjell dëm popullit vazhdimisht? Në momentin që të gjithë të përqendruar fort politikisht dhe moralisht në mënyrë të pastër që këtu bëhet fjalë për një betejë për të ardhmen e vendit. Nuk është beteja për të ardhmen e politikës apo karrierës, as të Lulzim Bashës e as të Monika Kryemadhit, as e Petrit Vasilit që ndodhet këtu në studio apo e liderëve të tjerë. Këtu bëhet fjalë se si shpëtohet vendi nga kjo e keqe e madhe. Në momentin që të gjithë kanë krijuar këtë bindje absolute dhe kanë këtë pozicionim , formësimi në një platformë të jeni të bindur është aq i lehtë e i thjeshtë , një çështje që ha pak minuta.

Vasili përse duhet t’ju besojnë shqiptarët? Keni qenë vetëm në pushtet deri sa keni dalë në opozitë.

Nuk besoj që e keni harruar që e kemi filluar për vite të tëra në opozitë. Kemi qenë edhe në qeverisje dhe jemi përsëri në opozitë. Jo, nuk kemi qenë në pushtet gjithë kohën. Kemi qenë në opozitë por edhe në pushtet si të gjithë forcat e tjera politike që i kanë provuar të dyja. Për sa i takon çështjeve të krimit, luftën dhe instrumenteve që e kanë këtë gjë, nuk janë zotëruar në asnjë rast dhe në asnjë mazhorancë nga lëvizja Socialiste për Integrim. Kurrë nuk ka pasur drejtues as të lartë, as ministra e as drejtorë të përgjithshëm policie, as drejtues lokal policie, as drejtues të shërbimeve inteligjente në të gjitha nivelet të ushtrisë e rendit nga LSI. Kemi një ndjeshmëri, na vjen keq por nuk mund të marrim përsipër një përgjegjësi për të cilën nuk na është dhënë mundësia kurrë ta ushtrojmë në asnjë ditë të vetme. Kështu që, sigurisht do mbajmë ato përgjegjësi që na takojnë, por për një gjë që s’na takon do ishte hipokrizi që të thoshim që edhe ne na vjen keq por dhe ne ishim pjesë. Nuk ishim pjesë në atë punë dhe ka qenë një përkujdesje e mençur për t’ mbajtur sa më larg lidhur me këtë çështje.

Flasim pak për reformën zgjedhore. Këtë të enjte do të diskutohet në parlament një draft? E thotë kryeministri Rama shumë shpesh është një reformë që do bëhet midis PD-PS. Ju si do të arrini të ndikoni, menaxhoni e të krijoni besueshmëri se kjo reformë zgjedhore nuk ngrihet për të goditur parti si LSI-a?

Do të diskutohet për vendimin e ngritjes së Komisionit të reformës Zgjedhore. Ç’të keqe ka. Le ta bëjë. Është shumë e thjeshtë çështja. Ne kemi një raporti të OSBE/ODIHR që thotë dy momente themelore të zgjedhjeve. Zgjedhjet u karakterizuar nga shitblerja e votës dhe krimi nëpërmjet kandidatëve të tij dhe mbështetësve, pati një rol përcaktues në zgjedhje. Çdo lloj reformë zgjedhore të bëjnë PS e PD, me apo LSI por në qoftë se nuk i kthejnë përgjigje këtyre dy çështjeve të mëdha, të gjitha llojet e reformave, parlamenteve e qeverive do të ishin një qeveri evotës së blerë dhe kriminelëve. Kështu që këto janë dy çështje që duhet t’i japin përgjigje. Se me çfarë kompromisi jepet përgjigja këtyre çështjeve, s’ka asnjë rëndësi për mua. Rëndësi ka për mua që në Shqipëri të mos shitet e blihet vota më dhe kriminelët mos të qeverisin fushatave elektorale dhe të mos hyjnë në parlament. Në 25 vjet, shitblerja e votës dhe përfshirja e kriminelëve si kandidat e si mbështetës, është shkruar e zeza në të bardhë. Këto janë dy çështje që duhen adresuar. Votimi elektronik, apo me skaner, apo me dorë, në qoftë vota është blerë apo është trafikuar nëpërmjet kriminelëve apo parave të drogës, ai do të numërojë një votë të pisët. Ne nuk duam që të numërohen vota të pista, por vota të pastra.

Si do të ndikoni ju që Kodi Zgjedhor të jetë garant për këtë që ju thatë, sepse nuk jeni në tryezë?

Ne do të jemi në tryezë dhe kjo nuk diskutohet. Këtë vend nuk na e japin të tjerët, këtë vend na e japin votat që kemi në parlament, sepse ka një proporcionalitet përfaqësimi. Kështu që, në tryezë do të jemi. Ne patëm së fundmi një Komision të Reformës Zgjedhore, i cili nuk dha dot asnjë rezultat, megjithëse votat nuk ishin aty. Thënë e gjithë kjo, nuk është çështje votash, është çështje vullneti. Nuk besoj kurrë që Partia Demokratike t’i japë në mirëkuptim Partisë Socialiste që të vazhdojë të shitet dhe të blihet vota dhe që kriminelët të kenë liri pa fund. Nëse PD do ta bënte këtë gjë, ky do të ishte një kompromis që do të ishte kundër shqiptarëve, sigurisht do të ishte edhe kundër PD-së. Kështu që, këto janë çështjet që janë në tavolinë dhe po nuk iu dha përgjigje këtyre dy çështjeve, të gjitha çështjet e tjera s’kanë asnjë lloj vlere dhe asnjë lloj forme, qofshin këto deputetë të prodhuar me çdo lloj sistemi zgjedhor, këto janë pjellë e një mitre të sëmurë nga krimi dhe nga droga.

Nëse do të bëhet ky fronti opozitar, ju do të kërkonit nga Lulzim Basha që të përfaqësonte dhe të ishte pro idesë suaj përsa i përket reformës zgjedhore, sistemit elektoral që mund të zgjidhet nesër, apo është ende herët për këtë?

Së pari, momenti thelbësor është një kompaktësim idesh, kompaktësim qëndrimesh dhe morali për një rrezik të madh që i kanoset vendit. Unë nuk e shikoj kryeministrin si kundërshtar. Në momentin që kryeministri përzihet me krimin dhe me drogën, dhe këtë e dëgjoi edhe nga goja e ambasadorit amerikan, këtu bëhet fjalë për rrezik dhe jo më për kundërshtar. Janë koncepte krejtësisht të ndryshme. Këtu bëhet fjalë për të shpëtuar vendin. Unë s’kam çfarë gjuhe të gjej me Lulzim Bashën dhe nuk besoj se kam nevojë ta bind duke i thënë se duhet luftuar shit-blerja e votës dhe kriminalizimi i saj. Unë jam i bindur që ai mendon si ne.

Çfarë ka ndryshuar në marrëdhënien tuaj me Lulzim Bashën? Duket sikur janë zbutur akujt mes jush… Ishit ju që e patë me skepticizëm marrëveshjen e tij me z. Rama…

Nuk kam qëndruar asnjë centimetër qëndrim lidhur me atë marrëveshje. Dhe që kjo marrëveshje ishte një dështim që nuk prodhoi asgjë të mirë, me shumë korrektesë politike, këtë z. Basha e ka pranuar vetë. Z. Basha gaboi me bashkëbiseduesin, i cili është i njohur për mungesën e plotë të moralit në marrëveshje apo të papërgjegjshmërisë ndaj vendit. Në qoftë se z. Lu bënte fjalë për banda që janë jashtë kontrollit, gjallojnë dhe qeverisin Shqipërinë, do të thotë që kjo marrëveshje ishte si një organ i përdorur nga Edi Rama për të mbuluar pisllëkun e zgjedhjeve.

Çfarë ka ndryshuar në marrëdhënien tuaj me Edi Ramën, me të cilin deri dje keni bashkëqeverisur vendin për katër vite me radhë?

Unë jam vetëm objektiv. Unë nuk kam ngritur dhe nuk ngre kurrë probleme që kanë të bëjnë me raportet personale të kryeministrit. Raportet janë objektive. Kam publikuar së fundmi një status ku kam bërë me dije dy gjetje shumë të rënda të FMN-së, që koncesionet janë një rrezik evident fiskal për vendin. Dhe njëkohësisht që rreth 120 milion euro shteti ua ka borxh bizneseve. Ju e dini, për koncesionet unë kam ndërmarrë edhe një nismë ligjore për rrezikun e madh që i kanoset vendit. Kam një konfirmim shumë të hidhur nga FMN-ja. Po të nxirrni materialet filmike në 2013-n, një nga përbetimet në Parlament ishin që borxhe ndaj bizneseve nuk do të ketë më, qeveria do të jetë korrekte, dhe ja ku jemi sot. Kanë 120 milionë euro borxhe. Raporti është i tillë. Në rast se më thonë se mbi 500 milion euro ikin nga bankat shqiptare dhe kreditojnë bizneset e huaja maqedonase, turke apo kosovare dhe nuk kanë motiv që të kreditojnë bizneset në Shqipëri, atëherë këtu kemi një klimë krejtësisht të paqëndrueshme biznesi. Raporti thotë po ashtu se nuk janë bërë përpjekjet e duhura për të luftuar për të ulur borxhin, ka një keqmenaxhim të tij. Ka edhe një të dhënë tjetër, që niveli i mbledhjes së të ardhurave është më i ulët se në vitin 2008.

Por raporti mbështet edhe fuqizimin ekonomik të vendit…

Raporti duhet lexuar në mënyrë integrale. Unë nuk jam për këtë lloj dorëzimi të shtetit dhe shkatërrimit të ekuilibrave ekonomikë. Kemi edhe diçka tjetër. E thotë edhe MOODY’s që Shqipëria në 2018-n përballet me një mungesë të theksuar investimesh të huaja pasi TAP-i dhe Devoll Hydropower përfundojnë investimin e tyre. Dhe se do të ketë një tronditje ekonomike për shkak se investime të reja të mëdha nuk shihen dhe se Shqipëria është e varur nga investimet e huaja si asnjë vend tjetër në Europën Juglindore. Këto janë evidentime të përditshme.