Rama e fton PD ta votojë Gramoz Ruçin për kryeparlamentar

Një ditë përpara nisjes së sesionit të ri parlamentar, Edi Rama mblodhi grupin e ri parlamentar të dalë nga zgjedhjet e qershorit.

Prova e parë e grupeve parlamentare do të jetë votimi i Gramoz Ruçit si kryetar i ri i Parlamentit, për të cilin Rama kërkoi nga Partia Demokratike ta votojë si një ndër deputetët me më shumë eksperiencë parlamentare dhe në favor të një klime të mirë politike në Parlament.

“Kundërshtarëve tanë u them se nëse refuzojnë të votojnë Gramozin, refuzojnë të votojnë një herë deputetin më të vjetër dhe 100 herë se refuzojnë të kuptojnë se Shqipërisë dhe shqiptarëve nuk u duhen topat e baltës së hedhur nga politika”, deklaroi Rama.

Mbledhjen e parë me grupin e ri parlamentar, Edi Rama e shfrytëzoi edhe për të njoftuar mënyrën sesi do të veprohet në vijim për qeverinë e re, por edhe për punën e socialistëve me zgjedhësit.

“Në Kuvend do të nisë një kapitull i ri i jetës parlamentare. Fillimjavën e ardhshme do të paraqesim në Kuvend qeverinë e re dhe programin e saj. Puna e grupit nis zyrtarisht nesër me seancën e parë të Kuvendit dhe do të vazhdojë intensivisht jo vetëm në Kuvend, por edhe në terrenin, ku skuadrat e deputetëve do të jenë të pranishme siç e kemi folur edhe më parë për të vijuar komunikimin me zgjedhësit”, u shpreh ai.

Kreu i maxhorancës kërkoi nga deputetët që në 4 vitet e ardhshme në qeverisje dhe Parlament të tregojnë disiplinë, pasi sipas tij, ajo do të luajë një rol kyç në shprehjen e vullnetit për të qenë deri në fund.

Gjithashtu, socialistët konfirmuan krahas Gramoz Ruçit si kryeparlamentarin e ri, edhe Taulant Ballën si kryetarin e Grupit Parlamentar pas votimit të vetë deputetëve të pranishëm. /Tch/