Mikhail Kallashnikov, shpikësi i asaj që konsiderohet si arma më vdekjeprurëse e krijuar ndonjëherë, nderohet me një statujë në Rusi.

I vendosur mbi një piedestal në një shesh të vogël të Moskës, Kallashnikovi, i cili vdiq në vitin 2013, shfaqet me një xhakovendë duke shtrënguar me të dyja duart armën e famshme “AK-47”.

“Krijove një armë për mbrojtjen e atdheut tim”, është fraza e skalitur në piedestal.

Skulptori që realizoi statujën i barazoi armët me vazhdimësinë e jetës.

“Në mënyrë që jeta të vazhdojë, që fëmijët e vegjël të rriten, e për gratë e bukura të Rusisë duhet të ekzistojnë armët”, tha Salavat Shcherbakov.

Në ceremoninë e përurimit, ministri i Kulturës Vladimir Medinski tha se kallashnikovi është një markë e vërtetë kulturore e Rusisë.

Një në 5 armë zjarri në botë është kallashnikov dhe më shumë se 70 milionë armë sulmi janë prodhuar gjatë 60 viteve të fundit, thuhet në faqen e internetit dedikuar shpikësit.

Kallashnikovët përdoren në 50 ushtri të huaja. Ekspertët ushtarakë thonë se “AK-47” ka vrarë më shumë njerëz se të gjitha armët moderne të marra së bashku.

Mikhail Kallashnikov, i cili vdiq në moshën 94-vjeçare, ka përsëritur vazhdimisht se krenaria e shpikjes së tij ishte e ndërthurur me dhimbjen që arma po përdorej nga kriminelët dhe ushtarët fëmijë.