Mbase pajisjet elektronike lehtësojnë jetën e njeriut, por sipas studime te kryera puna e gjatë para kompjuterit dhe pajisjeve tjera elektronike, ekranet e të cilave emetojnë dritë të kaltër, mund të shkaktojnë dëmtime afatgjate të shikimit dhe pagjumësi.

Rezultatet e disa studimeve britanike kanë nxjerrë në pah se gjashtë nga dhjetë persona të moshuar nuk flenë mjaftueshëm si rezultat i shfrytëzimit të pajisjeve elektronike.

Autorët e studimit thonë se kjo është jashtëzakonisht shqetësuese. Gjumi i pamjaftueshëm, nën shtatë orë në ditë te të moshuarit, shton gjasat për obezitet, sulme në zemër, diabet dhe kancer.

“Drita e kaltër e pajisjeve nxit prodhimin e melatoninës, një hormon i cili ndikon në gjumë, ndaj është e rëndësishme t’i shmangni ato para fjetjes”, thotë Richard Wiseman nga Unvierstieti Hertfordshire.

Ndërkohë, specialisti i syve Andy Hepëorth thotë se “rrezet blu-violet janë shumë të rrezikshme dhe toksike për syrin” dhe shton se dëmtimi është edhe më i madh nëse ju shikoni pa mbyllur sytë shpesh dhe pa u shkëputur kohë pas kohe nga ekrani. “Brenda një periudhe të gjatë kohore kjo mund të dëmtojë sytë tuaj”, thotë ai.

“Edhe pse nuk e dimë nëse ekziston një lidhje e e drejtpërdrejt në mes të problemeve me shikimin, ka dëshmi të mjaftueshme laboratorike për efektin e tyre të dëmshëm”, shton Hepworth.

Hulumtimi ka treguar se madje gjysma e të rriturve të cilët kalojnë rreth shtatë orë në ditë duke shikuar në ekrane, fillojnë të ndjehen të shqetësuar kur janë larg pajisjeve elektronike, për shembull nga telefonat e mençur.

 

Ekspertët thonë se këshilla është shumë e thjeshtë – rregullisht bëni pushime kurdo që keni punë me kompjuterin ose pajisjet tjera elektronike. Më herët një studim trevjeçar japonez kishte përcjellë 25 mijë persona dhe kishte treguar se qëndrimi para kompjuterit më shumë se pesë orë në ditë shton dukshëm rrezikun e vuajtjes nga depresionit.

“Rezultatet tregojnë se me qëllim të parandalimit të çrregullimeve mentale dhe çrregullimeve të gjumit, është mirë të kufizohet përdorimi i kompjuterit në më pak se pesë orë në ditë”, është shprehur lideri i studimit, Tetsuya Nakazawa.