Presidenti amerikan Donald Trump u është përgjigjur sot zërave të shumtë për mundësinë e zgjidhjes së krizës mes SHBA dhe Koresë së Veriut nëopërmjet një dialogu. Vetëm me një fjali ai e hodhi poshtë këtë opsion sepse sipas tij kërkesa për një zgjidhje diplomatike të krizës me regjimin e Phenianit ishte e destinuar të dështonte.

“Që prej 25 vitesh, SHBA po diskuton me Korenë e Veriut. Të dialogosh nuk është zgjidhje!”, shkroi presidenti amerikan vetëm 24 orë pas lëshimit nga regjimin i Kim Jong-Unit të një rakete qe kaloi edhe mbi territorin japonez.

Administrata e Donald Trump, ashtu si ajo e paraardhësit të tij, Barack Obama ka qenë e ashpër përballë regjimit koreanoverior, me shpresën për ta bërë të heqë dorë nga programet bërthamore dhe balistike. Kreu i diplomacisë amerikane, Rex Tillerson rikonfirmoi gjithashtu se ishte i hapur për negociata me Phenianin, me kushtin që ato të përqendrohen në denuklearizimin e Koresë së Veriut.

“Ne do të vazhdojmë fushatën tonë me presion paqësor me aleatët tanë, me Kinën, për të parë nëse kjo do ta sillte Phenianin në tryezën e negociatave, për fillimin e një dialogu për një të ardhme ndryshe për gadishullin korean dhe Korenë e Veriut”, ishte shprehur ai disa ditë më parë. Sot, Kina, partneri kryesor tregtar i Koresë së Veriut, bëri thirrje për përpjekje të vazhdueshme për gjetjen e një zgjidhjeje diplomatike dhe paqësore për këtë krizë dhe kritikoi thirrjet e përsëritura që i janë drejtuar asaj nga SHBA-ja për të rritur presionin ndaj Phenianit.