Presidenti i Serbisë Aleksandar Vuçiç ka shprehur kënaqësinë e tij ndaj thirrjes së tij për dialog të brendshëm për Kosovën, dhe ka thënë se ka vënë re se ka shumë deklarata serioze dhe të përgjegjshme për këtë temë nga njerëzit si akademiku Dusan Kovaçeviç. Ky akademik ka thënë, se Serbia nuk ka më djem për luftë të re me Kosovën, e kjo duket se i ka pëlqyer edhe Vuciç-it, shkruan “gazetametro”.

“E shihni që kemi arritur ta realizojmë atë, gjithkush po flet për këtë. Ai dialog i brendshëm ka filluar, siç shihet kemi edhe deklarata edhe nga njerëzit e përgjegjshëm dhe serioz siç është Dusan Kovaçeviç, por edhe shumë deklarata tjera të papërgjegjshme, por ky është një dialog. E kemi pritur këtë dhe kjo është një gjë shumë e mirë. E kemi hapur këtë temë”, ka thënë Vuçiç për RTS nga Nishi.

Presidenti ka theksuar se ky dialog nuk është menduar që dikush ta vizitojë në presidencën e tij, siç edhe kanë menduar disa të tjerë.

“Jo. Ky është një dialog shumë shoqëror dhe do të ndahet në shumë tema, ku dhe do të bisedohet për secilën temë veçmas, të shohim dhe të mundohemi të jemi realë, të mundohemi ta zgjidhim problemin sot, që të mos ia lëmë fëmijëve nesër. Nëse dikush e kupton këtë gjë”, ka shtuar Vuçiç.

Ai gjithashtu ka theksuar se: “Të gjithë njerëzit në Serbi e kuptojnë se nuk duhet të ndryshohet asgjë, të ndalemi te problemet e njëjta dhe për fëmijët tanë, ndërsa në të njëjtën kohë nga shteti kërkojmë më shumë para, edhe shumë gjëra tjera që shteti duhet t’i zgjidhë por ky shtet nuk mund t’i zgjidhë, atëherë kjo tregon përkushtim të vogël për zgjidhjen e problemeve dhe përgjegjësi të pamjaftueshme”.