Shkodër, Vrasje me armë zjarri për shkak të pronës, humb jetën mjeku (FOTO)

Pak para mesnatës, në lagjen “Qemal Stafa”, shtetasi Dritan Ymeri, ka qëlluar me armë zjarri shtetasin Ilir Alija dhe për pasojë, Aliaj ka humbur jetën.

Nga njoftimi paraprak i policisë Shkodër, bëhet me dije se ka mbetur i vrarë, Ilir Alija, 40 vjeç.

Policia e Shkodrës dhe FNSH-ja ndodhet në vendngjarje dhe kanë rrethuar autorin i cili dyshohet se gjendet i armatosur në banesën ku ka ndodhur vrasja.

Burime të Shqiptarja.com bëjnë me dije se konflikti ka ndodhur për shkaqe pronësie dhe konflikti mes dy familjeve ka qëne i hershëm.

Njoftim paraprak nga Drejtoria e Policisë Shkodër

Shkodër- Informacion Paraprak

Në sallën operative të Drejtorisë Vendore të Policisë Shkodër ka ardhur një telefonatë për  nje vrasje  të ndodhur në lagjen “Qemal Stafa”, te “Ish Dekori”.

Me marrjen e njoftimit,  shërbimet e Policisë  kanë shkuar menjëherë në vendngjarje ku ka rezultuar se:

Pas një konflikti të çastit mes shtetasit I.A dhe D.Y, ky i fundit ka qëlluar me armë zjarri shtetasin I.A, ku si pasojë e të shtënave  ka mbetur i vrarë shtetasi I. A., 40 vjeç, banues në lagjen Qemal Stafa.

Autori i dyshuar shtetasi D.Y, sipas informacioneve dyshohet se është fshehur në banesë,  e cila  është rrethuar nga Policia dhe pritet ndërhyrja e F.N.SH.

Grupi hetimor në vendngjarje po punon për grumbullimin e provave ligjore duke bërë të mundur sqarimin e rrethanave të ngjarjes si dhe dokumentimin ligjor të saj.