‘I forti’ i fshatit u pret ujin banorëve, policia i gjen armë në shtëpi (FOTO)

Pasi u preu ujin banorëve të fshatit duke dëmtuar rrjetin e ujësjellësit, policia i gjen pranë banesës armë dhe municione.

Protagonisti i ngjarjes është 63-vjeçari Ndue Rica, banues në fshatin Shkopet të Kurbit.

Policia njofton se nga shërbimet policore të Komisariatit të Policisë Kurbin, falë ndërhyrjes në kohë, është bërë e mundur parandalimi i përshkallëzimit të një konflikti mes banorëve të fshatit dhe Ricës, si dhe sekuestrimi i disa armëve dhe municioneve.

Gjatë kontrollit në banesën e tij, u gjetën  të fshehura në një ambient afër banesës së 63-vjeçarit, armë zjarri e municione luftarake të cilat u sekuestruan në cilësinë e provës materiale:

– 2 pushkë model 63;

– 19 kapsolle detonatore;

– 5 metër fitil zjarrpërcjellës;

– 835 fishekë të ndryshëm (pushke dhe pistolete);

– 3 krehëra.

Ndue Rica, kishte konflikt me disa fqinjë të tij në lidhje me rrjetin e ujësjellësit. Gjithashtu dyshohet se ai ka dëmtuar rrjetin e ujësjellësit që furnizon banorët e fshatit ku ai banon si dhe të shtetasve me të cilët ka konflikt.

Materialet proceduriale në ngarkim të 63-vjeçarit i kaluan Prokurorisë së Rrethit Gjyqësor Kurbin për veprat penale “Prodhim dhe mbajtje pa leje e armëve luftarake dhe municionit” dhe “Shkatërrim i rrjetit të ujësjellësit”.