Arrestohet në Durrës një nga bosët më të mëdhenj të drogës. Ja kush është (FOTO)

Është arrestuar sot në Durrës, ai që në Itali, konsiderohet një ndër bosët më të mëdhenj shqiptarë të drogës.

Dario Myftiu 38 vjeç, i dënuar më parë për falsifikim dokumentesh, është vënë në pranga, bëjnë me dije burime zyrtare nga Policia e Durrësit.

Myftiu, në kërkim ndërkombëtar, është arrestuar me qëllim ekstradimi drejt Italisë. Gjykata Italiane ka lëshuar ndaj tij urdhër arresti për veprën penale “Trafik droge”. Konkretisht, Gjykata e Padovës me datë 06.07.2017, ka lëshuar Urdhrin e Arrestit për veprën penale, “Trafik droge”, parashikuar në nenet 81, të Kodit Penal Italian, dhe nenit 73 e 80 të ligjit “Mbi drogat”.

Myftiu rrezikon të dënohet 20 vite burg. Për arrestimit e tij, specialistët për Hetimin e Narkotikëve në Drejtorinë Vendore të Policisë Durrës kanë bashkëpunuar me Interpol dhe Sektorin e Narkotikëve në Drejtorinë e Policisë së Shtetit.

Në vitin 2008, hetuesit italianë zbuluan se apartamentin ku ai banonte në vendin fqinjë, e kishte kthyer në një rafineri droge. Atje u gjetën plotë 30 kg heroinë, që asokohe vlerësohej 1 milionë e 500 mijë euro.